توضيح بخصوص هاشم البسطاوي: واش اعتزل التمثيل بسبب التوبة ولا حيث مريض ؟

كنتساءل كيفاش مجموعة من المنابر الزميلة ، وصفات فمقالاتها الإخبارية خبر نشراتو "كود"، ب"الإشاعة".. غير لأن الممثل أسامة البسطاوي، خرج لبارح يكذب الخبر اللي نشرتو كود عن مرض خوه الممثل هاشم البسطاوي...
هذا فنظري تحامل كبير على جريدة من ديما تعرفات بتحري الصدق والبحث على الحقيقة بلا زواق وبلا نفاق.
لأولي الألباب كما يقال، وباش نزيد نوضح كثر حقيقة هذ الخبر اللي توصف ب"الإشاعة"، أنا حاولت نتصل لبارح الخميس بهاشم البسطاوي مرات كثيرة، باش يوضح لي دواعي اعتزالو، فماجاوبنيش، حتى لجوايه الثلاثة ديال لعشية على جاوباتني السيدة فتيليفونو، كتقول من بعد ما سولتها أنها أمه،السيدة سعاد النجار، وهكذا حكات لي أن ولدها مريض بمتلازمة "بهجت" وناعس فالسبيطار، واستمر كلامنا لمدة دقيقة و21 ثانية بالضبط، على رقمو الشخصي اللي ماشي سر، وصحافيين كثار كيتوفرو عليه وكيتواصلو معاه.
لأسامة البسطاوي اللي كذب "كود" وطعن فمصداقيتها، بغيت نسولو فقط واش هاتف الأخ ديالو محطوط فالشارع العام؟ أو مشفور؟ ماكرهناش يخرج يوضح حقيقة هذ المكالمة الغريبة العجيبة اللي دارت بيني وبين أمه، هي امه طبعا وأنا صدقتها حيت معروف أن الهاتف حاجة شخصية بزاف، ويستحيل يجاوب فيه شي شخص إلا كان من أقرب المقربين، إلا إلى كان أسامة يكذب أمه، هذي هضرة أخرى..
للزملاء والصحاب اللي كذبو خبر "كود"، وكاين منهم اللي طنز وتشفى، كنقول ليكم شكرا بزاف، والله يجازيكم بالخير على تضامنكم، ومهنيتكم، وركوبكم على امواج هذ الواقعة بعدما فشلتو نتوما فالحصول على هذ السبق، اللي طبعا حتى واحد فيكم ما كان يضيعو لو كان طاح فيديه، وكان ينشرو بسرعة البرق، وبلا تفكير.
لو كان هاشم فعلا فالسبيطار وفحالة سيئة كما بلغنا، "كود" كتمنى ليه الشفاء، أما لو كان هذشي ماشي صحيح، فراه خبر "كود" ماتنشرش من الخوا، بل عن مصدر مقرب، وبحسن نية.
ولحد الياعة، حاولات "كود" تتصل بكل من هاشم البسطاوي، وكذلك خوه أسامة، لكن حتى واحد فيهم ما كيجاوب.