واقيلا منيب بغات تنفارد بالانتخابات. واخا مازال ماكملات سيمانة على انسحابو من الفيدرالية.. أعضاء الاشتراكي الموحد علنو على مشاركة الحزب فالاستحقاقات الجاية برمز "الشمعة"

أعضاء فشبيبة الحزب وفالدوائر الإقليمية ديال الاشتراكي الموحد كيبارطاجيو ففيسبوك، وبشكل كبير، تدوينة منقولة ومعممة، كيعلنو فيها على استعداد الحزب للمشاركة فالانتخابات الجاية، واخا مازال ما كملات حتى سيمانة على إعلان الأمينة العامة للحزب، نبيلة منيب، على انسحابها من فيدرالية اليسار.
هذ البيبليكاسيون فضحات نوعا ما نية منيب والمكتب السياسي للحزب فالإعداد للانتخابات على بكري، بلا صهد وبلا زايد، وهذشي اللي كانو شككو فيه الأمناء العامين لأحزاب الفيدرالية، علي بوطوالة وعبد السلام لعزيز، بعد انسحاب منيب بلا مبرر مقنع، كيف قالو.
البيبليكاسيون منتشرة بحال العافية وسط التبن، ومرفوقة بلوكَو "الشمعة" الخاص بالحزب، وهو الرمز اللي مازال ماتعودو عليه المغاربة، وباقي مغمور بالمقارنة مع لوكَو الفيدرالية اللي كيرمز للرسالة، بحكم مشاركة الأحزاب الثلاثة تحت يافطتو فالانتخابات من سنوات طويلة هذي.
كتقول التدوينة، اللي هي بمثابة إعلان غير رسمي للاستعداد للانتخابات: "أخبر جميع صديقاتي وأصدقائي من المتعاطفات والمتعاطفين مع الحزب الاشتراكي الموحد والمؤمنين بمشروعه السياسي المناهض للفساد والاستبداد بجميع أنحاء المغرب، أن الحزب سيخوض الاستحقاقات الانتخابية المقبلة برمزه الأصلي الشمعة متمنيا التوفيق لباقي مكونات اليسار".
وعلى حساب انتماء العضو اللي حط التدوينة فالدائرة الانتخابية، اكتفو الأعضاء بإضافة اسم المدينة ديالهم فالتدوينة الى جانب عبارة "جميع أنحاء المغرب"، لاستهداف الجانب الإقليمي بالدرجة الأولى فهذ الإعلان.
ومازال قياديين كثار فالحزب ماعاجبهمش الحال، على رأسهم البرلماني مصطفى الشناوي اللي خرج فبلاغ كيعتبر فيه هذ القرار "طائش وانفرادي".