فعز جايحة كورونا.. مغربية قطعات 3000 كيلومتر على بيكالة ودازت من بداف ديال الدول الإفريقية وصرحات: كانت تجربة زوينة وكننصح الناس يزورو إفريقيا- تصاور

مغربية قطعات مسافة 3000 كيلومتر على بيكالة ودازت على دول إفريقية كثيرة وصرحات: هذي كانت تجربة زوينة وكننصح الناس يزورو إفريقيا – تصاور
كود- عن سكاي نيوز عربية//
قدرات شابة مغربية تقطع آلاف الكيلومترات وتعبر مجموعة من الدولة الإفريقية غير على البيكالة سنة 2020، فعز ازمة فيروس كورونا المستجد.
نورا إيفا، هي شابة ثلاثينية، قررات تخوض هذ التحدي من خلال أنها تمشي لبلاد بعيدة عمرها وصلاتها غير بالبيكالة، ونجحات فيه.
وماوقفش حلم نورا انتشار وباء كورونا، والإغلاق الإجراءات الاحترازية اللي صحباتو فكَاع دول العالم.
وقطعات نورا 3000 كيلومتر من مصر، اللي كانت نقطة انطلاقها، حتى لنقطة الوصول اللي هو رأس أقولاس بجنوب إفريقيا.
وقالت الشابة المغربية ل"سكاي نيوز" أن الخروج والاختفاء فجأة هو حلم كان كيراودها سنين هذي، الشي اللي خلاها تقوم بهذ التجربة الفريدة.
وفمصر، كتعاود نورا أن البوليس كانوا معاونينها فالتنقلات ديالها، وميسرين ليها السفر، ومرافقينها، حتى كانو الناس كيشوفو فيها، بحيث كانت كتبان بحال شي مسؤولة كبيرة فالبلاد.
عرض للزواج
وعاودات الشابة ل"سكاي نيوز" أنها تلقات عرض للزواج من شاب سوداني فاش وصلات للخرطوم، كيف شكرات الشعب السوداني اللي شافت انه ظريف بزاف ومضياف، ومابخلش عليها بالمؤونة والإرشادات.
ودازت نورا على مصر والسودان ثم إثيوبيا، ووصلات للعاصمة أديس أبابا وحبسات، حيت تزامن هذشي مع الإغلاق وتعليق الرحلات الجوية، كيف كانت تقاست تماك بفيروس كورونا اللي ماخلاهاش تكمل الرحلة ديالها واضطرات ترجع بحالها فرحلة جوية للمغرب، من بعد ما بقات حاصلة تماك لمدة 6 أشهر.
هدية للمرأة المكافحة
وفاش رجعات للمغرب، قررات تعاود تسافر على البيطالة، تخليدا لليوم العالمي للمرأة، ومشات مسافة 1911 كيلومتر، واعتبراتها "هدية للمرأة المغربية اللي كتكافح باش توصل لحقوقها كلها".
واعتبرات نورا أن رحلتها لإفريقيا فريدة وعمرها غادي تنساها، رغم الصعوبات اللي مرات بيها، ونصحات الناس باش يكتاشفوها، حيت القارة السمراء "ماشي غير حيوانات متوحشة كنشوفوها فالتلفزة وأوبئة وحروب أهلية، هذي صورة نمطية ماعندهاش صلة مع الواقع".
وحثات نورا على زيارة أفريقيا، لجمالها وتنوعها ولغاتها وشعوبها اللي كتشابه كلها فالكرم والضيافة.
https://www.skynewsarabia.com/varieties/1455950-%D8%A8%D8%A7%D9%84%D8%B5%D9%88%D8%B1%D9%85%D8%BA%D8%B1%D8%A8%D9%8A%D8%A9-%D8%AA%D8%AA%D8%AD%D8%AF%D9%89-%D8%A7%D9%84%D8%AC%D8%A7%D9%8A%D9%94%D8%AD%D8%A9-%D9%88%D8%AA%D8%AC%D9%88%D9%84-%D8%A7%D9%95%D9%81%D8%B1%D9%8A%D9%82%D9%8A%D8%A7-%D8%A8%D8%A7%D9%84%D8%AF%D8%B1%D8%A7%D8%AC%D8%A9-%D8%A7%D9%84%D9%87%D9%88%D8%A7%D9%8A%D9%94%D9%8A%D8%A9