جامع گولحسن حفظ "دوزيم" فاسمو. كيفاش قناة عمومية عندها صحافيين قافزين ومخلياها لهادا يعرض على صحابو من المواقع وعلاش ما يستافدوش من تجربة "الاولى"

جامع گلحسن صحافي القناة الثانية واشهر معدي برامجها الحوارية ولى الامر الناهي فهاد القناة. غادي يدير مع انطلاق الحملات الانتخابية التشريعية والبلدية ل8 شتنبر المقبل٬ برامج حوارية يستضيف فيها قادة الاحزاب السياسية.
هاد الشي محدداه الهاكا كل حزب عندو مدة زمنية حسب تمثيليتو٬ لكن المشكل داخلي فالقناة. السي گولحسن عندو صحابو من الصحافيين كيعرض عليهم يحاورو معاه. واش من حقو؟ طبعا اللا. هادي قناة كتقدم خدمة عمومية وحتى علاقتها بوسائل الاعلام الخاصة المغربية من مواقع اخبارية واذاعات خاصها تكون على نفس المسافة.
مع جامع گلحسن لا فالاذاعة لا فالقناة هاد الشي ما كاينش. اللي صاحبو تكون اسلامي او داعشي او شيوعي ماشي مشكل المهم تكون صاحبو وتكبر بيه يعرض عليك. واخا القناة ما خلاهاش ليه بوه فالورث.
ثم المشكلة اللي مطروحة فهاد البرامج هي اعمق. اللي كيشارك خاصو يكون صحافي فموقع اخباري ما كيقلبش الاعلانات ديال الاحزاب فهاد الحملة الانتخابية. راه ما يمكنش تكون مسؤول على موقع اخباري وعندك اعلانات من احزاب سياسية وقبلتي هاد الاعلانات وتجي تحاور فالقناة.
لا قادة الاحزاب خاصهم يقبلو اي موقع عندو مصلحة تجاربة مع شي حزب فهاد الانتخابات ولا القناة خاصها تقبل.
الحل راه ساهل. علاش "دوزيم" ما ديرش بحال "الاولى"٬ فتجربة الصحافية صباح بنداود ممكن يستافد منها كلحسن. جابت صحافيين وصحافيات من الدار وهما اللي كيسولو المسؤولين السياسيين. دوزيم فيها صحافيين وصحافيات قافزين وقافزات٬هادي مناسبة يبانو.
اما التخربيق اللي باغي يديرو جامع گلحسن راه ما عندو معنى