مدير دوزيم والصحافية المتدربة. واش اغتصاب ولا تحرش جنسي ولا دعارة. ها للي مورط فيها سليم الشيخ

تسريبات الصحافية المتدربة في "دوزيم" سابقا سلوى بوشايب عن علاقتها بمدير القناة سليم الشيخ الجنسية او العاطفية او كل واحد يسميها كي بغى خلقت الحدث. هاد الشي ماشي جديد ف"دوزيم" سبق لصحافيات تشكاو بزاف من التحرش مع وحدين: مسؤولين صحافيين او مسؤولين تقنيين او اداريين. شي مشى فحالو وشي كمل وضاعتو وحقارتو فالتحرش فبلايص اخرى.
لكن تسريبات الصحافية واتهامها بسليم الشيخ بالاغتصاب فيه نقاش. اولا طريقتها فنشر الاخبار بعدما رفضات صحف كثيرة نشر هاد الموضوع٬ كيبين ان الامر ماشي اغتصاب وحتى لو كان كذلك ما نشر من حوار سواء هاتفي او ليزيميساس ما كيرجحش كفة الاغتصاب.
ما يمكنش لشي وحدة تعرضات للاغتصاب مع كل ما يترتب عنه من اثار نفسية ما كتمحاش يبقى عندو علاقة مع المغتصب واكثر من ذلك كتطلب منو خدمات او امور مشابهة. هاد الشي كيسمى حاجة اخرى ماشي اغتصاب. زد على ذلك ان هاد الشي ماشي جديد. والمتهمة عندها رغبة وحدة ماشي تقاضيه ماشي تحاكمو حقاش ما دارتهاش هادي مدة٬ رغبة وحدة هي تشوهو
فرضية ان هاد الصحافية خبرات سميرة سيطايل نائبة المدير العام ومديرة مديرية الاخبار وكالت ليها نقلب ليك علي شي خدمة فشي وكالة وهي ردت عليها باللي باغية تخدم فدوزيم" بغض النظر على صحة هذه الرواية من عدمها كيدين الصحافية ما كيخليش الناس تضامن معاها وتعتبر هاد الشي اغتصاب.
نمشيو بعيد. تقدر تكون هاد السيدة عندها علاقة جنسية مع مدير دوزيم" ولكن جنسية رضائية كان فيها عنف. هاد الشي كيوقع فالعلاقات الجنسية ولكن ما كيتسماش اغتصاب طالما ان المعنيين بالجنس عاجبهم الحال فهاديك اللحظة.
هاد الشي يقدر يتقلب على الصحافية المتدربة ويتهموها باللي دارت خطة باش تنعس مع مدير القناة لهدف واحد هو الخدمة. تسريباتها كتخلي هاد الكفة حاضرة.
اللي اكيد ومؤكد ان هاد العلاقة فيها تحرش واستغلال. سليم الشيخ مدير وهي متدربة. كل علاقة بين مدير ومتدربة فيها تحرش واستغلال. لو ان الصحافية كالت هاد الشي وكالت باللي اللي بغى يخدم فدوزيم من صحافيات خاصو يدير الجنس او يدار ليه الجنس او يمارسو كانت تكون مقبولة ويدافعو عليها. هاد الشي خطير بزاف ولكن ماشي فمستوى الاغتصاب. حقاش هو جريمة كبيرة لا فنظر القانون لا فنظر المجتمع
اللي مثير هو النيابة العامة ما فتحاتش تحقيق ولا الحكومة ولا البرلمان طالبو بيه. راه هاد الاتهام خطير. خاص تحقيق ونشوفو القضاء اش غادي يكول. ايلى كان اتهامها ما شادش خاص القانون يحميه لانه مدير مؤسسة معروفة وهاد الشي عندو تاثير كبير لا على اداؤو لا على مستقبلو لا على القناة ولا كان هاد الشي بصاح خاصو يتحاكم وقبل ذلك تتخذ ضدو قرارات انية.
هاد السكوت لا فصالحو لا هو لا القناة لا عائلتو لا دولة الحق والقانون