دوزيم غير كتخربق وها علاش ضد صحراوا وما فهماتش مسيرات الرباط والعيون: جابت ضيوف باستناء بوعيدة لا علاقة: وراه صحاب التراب اللي عندهم الشرعية الشعبية بصاح اللي خاصهم يكونو ماشي الصحاب ولحباب

القناة الثانية ما فهمات والو فمسيرتي الرباط والعيون الرافضة لتصريحات الامين العام الاممي بان كي مون. البارح دار جامع كولحسن حلقة برنامجه "مباشرة معكم" على قضية الصحراء. يعني اخر التطورات. البلاطو جاب فيه ناس كلهم ما عندهم علاقة بالصحرا باستثناء الوزيرة المنتدبة في الخارجية مباركة بوعيدة، اللي كانت مزيانة فالحلقة واختيار مسؤولة حكومية كان فالمستوى.
دابا هاد ناس دوزيم فين عايشين. غادين تكولو لي الشيخ بيد الله راه صحراوي وووو. بيد الله عندو جوجت المشاكل كتخليه لا يحضئ لا بالشعبية ولا بالتقدير والاحترام فالصحراء، صحيح انه نجح فمجلس المستشارين ولكن كيفاش نجح. لو ان مرشح التجمع الوطني للاحرار اللي بغى يولي عامل ما نساحبش والله لا عتبها فمجلس المستشارين. ربح فانتخابات يتحكم فيها الناخبون الكبار. شوفو شحال جاب من صوت وفالسمارة.
السيد سكن بزاف فالرباط والاخطر انه ما شاركش حتى فمسيرة العيون واخا كان تماك باش يعزي رئيس جماعة قروية توفى. دابا واحد ما حاضرش لمسيرة تاريخية فالعيون وجابتو دوزيم يتحدث فالصحرا. ماشي هو اللي كان خاصو يحضر، كان خاص واحد من حزب الاستقلال فالصحرا اللي يحضر. عندهم الشرعية الشعبية ودارو مسيرة تاريخية. ما بغيناش نخرجو من هاد التخربيق. راه بيد الله فاتو التاريخ راه ما عندوش وزن فالصحرا لا هو ولا حزبو اللي بغى النهار الاول يقلع بالكلاب "ال الرشيد" وفالاخير ولينا فاكديم ايزيك ورجعنا سنوات للوراء، اعباد الله شوفو نتائج الانتخابات الاخيرة وجيبو اللي عندو شعبية باش تكون عندو مصداقية فالداخل وفالخارج.
كل من اتصلت بهم كود طيلة الايام الاخيرة من الصحراويين الوحدويين يؤكدون على امر واحد "حنا رقم اساسي فالمعادلة وخاصنا ندافعو على موقفنا بانفسنا". هاد الشي دارت "دوزيم" عكسو البارح. الباحث من اليابان لاش. عندنا باحثين صحراويين اكثر دراية بالملف وبجوانبه القانونية والسياسية وما عندهمش لغة الخشب علاش تم تغييبهم.
كاينين صحافيين قافزين كيخدمو فالعيون والداخلة وعندهم دراية كانوا خاصهم يجيو. اما المجتمع المدني فحشومة تجيبو ضيف غير صحراوي. راهم كاينين طيارات. دوزيم زكلات موعد مع التاريخ. كانت تبان واعرة بزاف ولكن بينات ما فهمات والو فهاد التحولات اللي عايشها المغرب هاد الايام