بزاف ديال المغاربة ما عندهمش مع الانتخابات. من الشباب تا للشيوخ. يلا سولتي مرا كبيرة واش غا تشاركي فالانتخابات غا تجاوبك لا! كلهم ولاد لحرام! غا تسول نفس السؤال لشاب، غا يقول ليك داكشي غير تخربيق، غا تسول واحد آخر غا يقول ليك الانتخابات مسرحية، واحد آخر غا يدير ليك محاضرة فكيفاش الأحزاب لا حول لها ولا قوة سياسيا. هاد الناس كاملين عندهم الحق.. نسبيا. لكن كلهم غفلو على جانب مهم فالانتخابات. فدولة بحال المغرب، صحيح أن الأحزاب والحكومات ما عندهاش السلطة بحال فالدول الغربية، صحيح أن الحكم ملكي دستوري قبل أي شيء آخر. لكن السؤال المطروح هو: شنو باغا القوة الحاكمة؟ شنو باغيين أصحاب القرار؟ أكيد باغيين التوازن، باغيين الظروف السياسية، الاقتصادية، الاجتماعية تكون مريحة، داكشي علاش تايتعاملو دائما بطريقة براغماتية. يلا شافو الشعب تايميل لواحد التوجه تايميلو معاه. شنو العلاقة بالانتخابات؟ الانتخابات هي طريقة تعبير على التوجه ديال الشعب. يلا ربح حزب ديني، هذا تايبين أن الدين عندو دور مهم فحياة المغاربة، الدولة ديك الساعة تاتحاول تعتاني بالأمور الدينية. نسا أنهم يحيدو ليك دوك القوانين القروسطية! يلا بغينا كمغاربة نبينو شنو باغيين، خصنا نصوتو على الحزب للي تايعبر أكثر على المطالب ديالنا. ما تايهمش واش غا يربح ولا واش غا يدير خدمة نقية يلا وصل للحكومة. رسالة صوتنا فالانتخابات ما تانرسلوهاش للأحزاب، تانرسلوها لمن فوق الأحزاب. https://www.facebook.com/1056744907756531/posts/4126704077427250/?d=n
