جهة گلميم للي ناض فيها صداع.. بلاغ التحالف الثلاثي ماوقعوش ولد الرشيد اللي مكلف بالجهات الجنوبية فالاستقلال وخلا بلاصتو للقادري كيعطي دروس فالممارسات الديمقراطية وخوه شاد المنتخبين فبرشيد

الاستقلال وقع بيان مع البام والاحرار، باش يفكو حريرة "الغدر السياسي" للي تعرض ليه عبد الوهاب بلفقيه من الامين العام للبام عبد اللطيف وهبي، غير هو هاد البيان موقعوهش المسؤولين ديال هاد الاحزاب فالجنوب، خصوصا حمدي ولد الرشيد لي مكلف بالجهات الجنوبية فحزب الاستقلال.
اللي هو معروف هو ان ولد الرشيد هو للي كيحط النقط على الحروف فيما يخص الترشيحات والتزكيات فالجنوب، لكن شفنا واحد سميتو فؤاد القادري هو اللي وقع على البيان الى جانب الطالبي العلمي من الاحرار وسمير كودار فالبام.
البيان للي وقعو القادري هضر على تشكيل أغلبية داخل مجلس جهة كلميم واد نون؛ وذلك من أجل خلق انسجام واستقرار داخل المجلس الجهوي، ووضع حد لممارسات أصبحت مرفوضة من قبل الرأي العام المحلي والوطني. وقد تم الاتفاق على إسناد رئاسة مجلس الجهة إلى امباركة بوعيدة، وفتح المجال أمام الطاقات الأخرى لتولي المسؤوليات داخل المكتب.
هنا كيعطيو الدروس للسياسيين وقالو بلي خاص القطع مع ممارسات اصبحت مرفوضة، مع العلم ان خو واحد من الموقعين (القادري) داير كثر من الممارسات المرفوضة، هاد خوه داير احتجاز للمنتخبين، وخطفهم. اساليب متخلفة وصافي. حاي دبا خوه فؤاد كيعطي دروس للمغاربة فالسياسة.
بل هاد القادري كيقول فالبيان الموقع مع البام والحمامة، بان "الأحزاب الثلاثة تدين كل الممارسات المرتبطة باحتجاز المنتخبين واستمالتهم بالوسائل غير المشروعة والتي يقدم عليها بعض سماسرة الانتخابات والتي تمس بجوهر الخيار الديمقراطي وصدقية العمليات الانتخابية، والمنافية لقواعد المنافسة الشريفة". اوا علاش ماديروش بيان على خوك اللي احتجز المنتخبين ف برشيد.