الجناح المغربي ف"اكسبو دبي" او المغرب اللي مقسم بين ولد الوزير اللي داير البناء العشوائي وبنت مكلفاها نادية فتاح وكتدي غير صحابها من الصحافيين وشي مؤثرين ما عند بوهم ما تأثير

بعد ما تخلاو على مصطفي بكوري تكلفات نادية فتاح وزير السياحة والنقل بالجناح المغربي في المعرض العالمي "اكسبو دبي 2020". الوزيرة عطات العلاقة مع الصحافة وحدة عندها مشكلة مع الصحافة وهي سناء سميج. ديما مخدماها معاها. طبعا هاد السيدة دات ليها صحابها فالصحافة. كيف قاعدتها ودردرات هاد الشي بشي وحدين باعتهم ليها باللي مؤثرين ومؤثرات وهما ما قادرينش يؤثرو على على اقرب المقربين منها.
فتاح خرجات هادي يومين فتصريح لاماب. يعني الخرجة الوحيدة اللي دارتها مع مؤسسة عمومية ماشي مع اللي داتهم ليها للي كلفتها بالعلاقات مع الصحافة. المندوبة هدرات علي "المشاركة المغربية في هذا الحدث الدولي تشكل فرصة لتأكيد التزام المملكة، من أجل رفع تحديات التنمية المستدامة".
واش التنمية المستدامة هي هاد خيتنا ديما واخدة المارشيات؟ هدرة كبيرة وباش يجي اي حدث وباش تشوف شكون مكلف وشكون كيدير اش، كيبان ليه هاد الهدرة خاوية وصافي.فهاد الحدث كاين مشكل حتى فالبرمجة. واش حاتم عمور هو اللي كيبين فين وصل المغرب ثقافيا او فنيا؟
فهاد 6 اشهر اللي غادي يبقى فيها المعرض غادي يكون غير باك صاحبي ما غاديش يعكس صورة لبلاد. المغرب متحرك دينامي. ما يمكنش يكون الا بوحدين كيعكسو هاد الدينامية فجميع الميادين.
هاد الحدث راه راه ڤيترين كبيرة للبلاد. نهار 26 دجنبر غادي يكون يوم المغرب. معرض مشارك فيه 190 دولة. خاص تسويق للبلاد.
هاد لفضيحة ديال هاد السيدة تزادت على فضيحة منح هندسة جناح المغرب لطارق ولد وزير الاقتصاد والمالية الاسبق فتح الله والعلو.
دابا هاد طارق غير حيت ولد الوزير كاع المارشيات كياخدهم. بزافت المهندسين فالبلاد ما فاهمين والو. علاش هاد طارق محظوظ بهاد الطريقة. فهاد المهندس محظوظ وبزاف. اخر المارشيات خداها من وزارة كان فيها بوه اي المالية. لفضيحة ان هاد طارق سملهم تصميم موقع باب إغلي بمراكش اللي غادي يكون فيه مؤتمر للبنك الدولي. مبلغ المشروع ب 60 مليار سنتيم وفق مهندسين ل"كود".
نفس الولد عطاوه مشروع المركز الثقافي المغربي اللي نتاقدوه سكان الدائرة 7 فحي سان مشيلبباريس. احتجاج خلى المشروع يتوقف
جناح المغرب في اكسبو دبي اخر صفقات هاد المهندس. التصاور اللي خرجو منو بينوه عادي.
ولد لوزير خدا رواق المغرب لملتقى الهندسة المعمارية 14 بايطاليافي مدينة ڤينيسيا وقبل كان تكلف بتهيئة باب اغلي ف COP 21 بمراكش. وكانت كلفة المشروع 100 مليار سنتيم.
بلا ما نهدرو علي المؤسسات العمومية اللي ما كاين غير ولد والعلو. فالمكتبالشريف للفوسفاط عطاه صفقة تصميم المدينة الجديدة لأزمور، قبل إنهاء مهمته في تلك الزوبعة التي هزت المدير السابق لمشروع المدينة و المقاولات التي اشتغلت هناك. بعدما كشفت تخربيق تقني و مالي في المشروع وصل ل90 مليار سنتيم.