المغربي بن صديق تفكر أيام الحبس قبل الكومبا ديالو مع البطل العالمي ريكو فيرهوفن – فيديو

البطل المغربي جمال بن صديق، واحد من أبرز المقاتلين على المستوى العالمي ف رياضة "الكيك بوكسينگ"، هضر على فترة صعبة عاشها ف الحبس.
وقال بن صديق، ف حوار مع قناة "VechtersBazen" ف يوتوب: "دوزت شهرين ونص ف الحبس، حسيت خلالها بالانهيار النفسي وأنا ف مساحة ضيقة، وداك الساعة كتشوف العالم مختلف من حولك".
وزاد المقاتل المغربي: "الحبس كيبقى عالم صعيب توصفو، كنت كنبكي ف الزنزانة وف الوقت نفسو كنحس ف ظهري بالآلام بسبب الإصابة اللي تعرضت لها من قبل".
وكانت السلطات البلجيكية شدات بن صديق ف مارس اللي فات، ووجهت ليه تهمة الاتجار بأجهزة اتصال مشفرة كتستعملها شبكة إجرامية.
وكيستعد بن صديق باش يواجه البطل الهولندي ريكو فيرهوفن، ف ال23 من أكتوبر الجاري، ف أمسية "GLORY Collision 3′′، وهادشي بعد انسحاب الهولندي أليستير أوفريم، من مواجهة مواطنو ريكو، بداعي الإصابة.