أسامة رمزي يخرج عن صمته بشأن حضوره في مباراة المنتخب المغربي ونظيره الغيني

خرج الكوميدي، أسامة رمزي، عن صمته بخصوص الجدل الذي أثاره حضوره رفقة مجموعة من المؤثرين بالويب المغربي، لمباراة الفريق الوطني، ضد المنتخب الغيني، أمس الثلاثاء،بالمجمع الرياضي مولاي عبد الله بالرباط.
وقال رمزي، في ستوري على حسابه بالأنستغرام "غادي ندير واحد التوضيح بسيط جدا وماشي تبرير..ولكن غير باش نسميو الأشياء بسمياتها حيت شي حوايج عمر شفتهم عندي، غادي نبدا الجواب ديالي بسؤال هو واش ايلا جاتكم دعوة من لاعب باش تفرجو فالماتش غادي تمشيو ولا لا والجواب هو نعم إيلا جاوبتو بمنطقية وحيادية، هادشي تماما اللي وقع لاعب في المنتخب الوطني صديق مقرب لينا عطانا دعوة نتفرجو، فيه أنا وواحد الصديق يعني حنا جوج فقط من وسط عشرات الناس اللي كايحضرو عن طريق دعوات من اللاعبين يا من عائلتهم يا أصحابهم هادشي علاش مشيت
ماشي حيت مشيت بدعوة من عند شي طرف أخر".
وتابع"ما فهمتش الناس اللي كايجيو و يكتبو ليا حنا ولاد الشعب ونتوما مشيتو ! شكون حنا ؟ را تا حنا ولاد نفس الشعب ولا كانكون ولد الشعب غير ماللي كانقول اش عاجبك؟ غريبة هاد القضية وما بغاتش تفهم ليا بحال ايلا النية ديالي هي نفقصكم ونقول ليكم أنا فالتيران ونتوما لا! الله يهديكم الإخوان ما تحاسبونيش على قرارات ما عنديش علاقة بيها وأنا من الناس اللي هضرو عليها واللي متبعني عارف هادشي مزيان".
وأردف"لبيت دعوة ديال صديق ديالي مشيت تفرجت فيه هادشي ما عندو علاقة لا بمشهور لا بحاجة اخرى ماشي حيت حضرو ثلاثة ديال الناس عرفتوهم غادي تقولو لا داو المشاهير و ما عرفت اش و توصلو انكم تسبو و کلام ما، عمر قريتو عندي. أنا بعيد علي داکشي ديال البوز وشاهد قبل الحذف والرد الناري وكانهضر بمنتهي الصراحة وثقافة الاعتراف والإعتذار عندي فالدم ما كانخافش نقول غلطت غير هو هاد المرة كانقول لواحد الفئة سمحو ليا راكم كنتو غالطين فالمحاسبة اما على الجمهور يحضر را غير هادي جوج سيمانات كتبت هنا نيت الجمهور خاصو يرجع حتى هو و كانهضو کمواطن مغربي من هاد الشعب باش ما يبقاوش شي ناس يدخلونا فمؤامرات بحال ايلا حنا داخلين فشي مجموعة ماسونية وشايفين راسنا أحسن من بنادم ! أنا ما شايف راسي أحسن ما کا نقصد نستفز أيا كان حيت ماشي أنا وماشي أسلوبي و فالأخير تحية لهادوك اللي فجاة بغاو يلبسو الثوب ديال البطل القومي و يشعلو علينا الناس را نقدرو نخدمو معكم بنفس الأسلوب و غادي تقلقو باش تبداو و تلعبو بالكلام العاطفي و تقولو حنا ولاد الشعب و هادوك الآخرين راه حنا كلنا ولاد الشعب".