نايضة أوموفوبيا ف غانا.. اللي كتب على المثلية الجنسية أو دافع عليها يصيفطوه ب10 سنين

البرلمان في غانا ناوي باش يفرض عقوبات قاصحة على اللي سماوهم ب"المروجين للمثلية الجنسية".
القضية حامضة في البلاد، وأي واحد كتب على المثلية الجنسية أو دوز تصريح على المثليين أو كيدافع عليهم غايتشد ف الحبس لمدة طويلة تقدر توصل ل10 سنين.
بزاف ديال المدافعين على حقوق المثليين قالو أن هادشي غير قانوني وكيزيد يكرس الإضطهاد و القمع اللي كيتعرضو ليه "الأقيات الجنسية" ف بحال هاد المجتمعات.
وقالت جماعات حقوقية إن مشروع القانون هو "أسوأ وثيقة معادية للمثليين على الإطلاق".
وصرح النائب البرلماني (من المعارضة في غانا) صامويل نارتي، أنه كيأيد هاد مشروع القانون، وزاد كَال: "خاصنا نحميو ولادنا باش مايكونوش ضحايا ديال المثليين، حيت كيحاولو يقنعوهم بأن المثلية هي شي حاجة نورمال".
ورجال الدين في غانا، من مختلف الديانات، كلهم مع هاد القانون و كيدعموه. وسنوات هادي سبق لأحد الفقهاء المسلمين تما أنه قال بللي "المثلية الجنسية هي السبب الرئيسي ديال الكوارث الطبيعية اللي كاتوقع ف البلاد".