خاص وزارة الصحة تواصل مع الناس بالدارجة وتهدر ليهم على الحالات لي بانو عليها أعراض اللقاح وشحال هي وشكون مات.. هاد الصمت كيزيد يعزز الإشاعات وخاص وزارة الداخلية تشد أي واحد كينشر أخبار كاذبة على أضرار اللقاح لأنه كيضر مستقبل البلاد

شائعات كثيرة بخصوص اللقاحات وأضرارها وتاريخ صلاحيتها، مجموعات الواتساب والمجموعات والصفحات في فايسبوك عامرين بهاد الهرطقات والطلقات بخصوص اللقاح، لدرجة تولي تخايل أن اللقاح رجس من عمل الشيطان بتدمير هاد الشعب العظيم باش يوليو يولدو غير المعوقين على أساس طفروه مع هادو لي عاديين وبصحتهم، قصص يومية كتنشر على أفراد ستعملو اللقاح وتشلل فيهم النص أو ماتو، أو مرضوا أمراض خطيرة، أو تكمش ليهم القلب، راه يقدرو يكونوا أعراض للقاحات وقعات بصح ولكن ماشي بهاد الكثرة والتهويل وهاد الكم الهائل من الحالات لدرجة بنادم كيهدر بيقين تام أن اللقاح مضر غادي يهلك الواحد ويقدر يقتلو كاع، أو على الأقل يخلي ليه إعاقة دائمة او شلل نصفي، أييه كاين حالات لي هلكها اللقاح كاين صحابي أنا نيت داروه ومرضهم واحد تقريبا شهر سخسخو ومن بعد برا ورجعات الأمور لمجاريها، وطبعا الأغلبية لقحوا من واليديا وجبد وماوقع ليهم والو، بحالهم بحال المليارات في العالم.
الموشكيل ديال هاد الشائعات هي كتكاثر وتناسل، وكتوقع فيها المزايدة شكون لي سبب ليه اللقاح أكبر ضرر، أو شكون لي كيعرف أكبر عدد ديال الحالات تضررو من اللقاح، واحد كيقول جاري لقح ومات من بعد سيمانة، لاخر كيرد عليه أنا عمي لقح كي رجع للدار مات، لاخر يقول أنا جاري جوج ولادو تشللو بسباب اللقاح، لاخر يرد عليه حنا دربنا كلهم ولاو كيتمشاو على ربعة، وهادشي في ظل غياب تواصل حقيقي من طرف وزارة الصحة، تواصل وتكذيب يومي بالمعطيات وبالدارجة لمثل هاد الإشاعات لي ولاو بسباب هاد الإحتجاحات ضد اللقاح بحال شي حقائق علمية حتى الشك فيهم يمكن يكفر الواحد ويدخلو في خانة العياشة والمكلخين لي هبطو السروال للدولة باش تدك ليهم الشوكة وتتحكم فيهم كيف بغات، على أساس أنها مكناتش كتحكم فيهم قبل كورونا كاع ومن نهار بانت الدولة أصلا.
هاد الحركة ديال مناهضي اللقاح وجواز التلقيح لقات أرض خصبة ديال المغاربة فاقدين التواصل مع الدولة ووزارة الصحة بشكل خاص، من غير دوك البيانات بالعربية الفصحى لي مكتفهم فيهم تاحاجة مكاينش شي واحد لي يخرج ويشرح للناس الحالات لي بانو فيها أعراض ديال اللقاح وشحال هي وشنو لي بان فيهم وشكون بقا عايش وشكون مات، وفي نفس الوقت وزارة الداخلية تتكلف بلي كينشرو الإشاعات تسيفطهم لغبيلة، حيت هادو إشاعات خطيرة وكتهدد مستقبل البلاد في الخروج من هاد الوحلة ديال كورونا، راه فاش كتكتب جارنا تلقح ومات وولاو تشللو واحد آخر كيكون غير متخوف من اللقاح أو متردد حتى كيلقى داك المنشور على كانتو بحال الى كيتسناه يعزز ويأكد ليه داك التخوف ديالو وكيدير مناقص من شي تلقيح حتى تولي الدولة غادا تابعاه تقلب عليه يجي يلقح، أما حتى هاد جواز اللقاح راه كنظن كيسولو عليه غير في الرباط قلب المدينة طبعا ماشي الأحياء، أنا نيت عمر شي حد سولني عليه من نهار داروه بوسطة بانكة أسواق كبرى، حتى بهاد الطريقة مكاين ماتزير، لي خاص هو التواصل والعقاب لصحاب الإشاعات.