يوسف بلايلي.. من التوقيف بسباب الكوكايين لهداف المنتخب الدزايري

ملي طاح قرار منع اللاعب الجزائري يوسف بلايلي من ممارسة كرة القدم لمدة عامين بعدما حصل كيضرب الكوكايين، عمرو كان كيتصور أنه غادي يقدر يرجع ويولي من الركايز ديال منتخب بلادو خصوصا في بطولة ال"كان" 2019 وحتى ف"كأس العرب" اللي مزال ملعوبة دبا فقطر، و وصل فيها المنتخب الجزائري للدومي فينال بعدما ربح المنتخب الوطني المغربي بپيلانتيات الويكاند الفايت.
اللعاب السابق ديال نادي اتحاد الجزائر دوز عامين خايبة، من 2015 فاش كانت عندو 23 عام، بقى مشومي ولكن حاول فهاد المدة يبقى يتريني مرة مرة خصوصا مع فرقتو السابقة مولودية وهران وكان أيضا كيلعب ماتشات مع فرق الأحياء فمدينتو، حسب ماقال فبعض التصريحات.
عقوبة التوقيف بسباب بليتو بالكوكايين كانت تقدر تسالي مع مسيرتو الكروية، لكن عندو الزهر فاش نقصو ليه المدة من 4 سنين لعامين، بعدما حاول محامي الدفاع يثبت بللي الغبرة تدارت ليه بلا خبارو وسط الشيشا اللي كان كيكميها!
من بعدها ضبرو عليه يمشي يلعب مع فرقة "أنجي" ففرنسا، اللي كان رئيسها من أصول جزائرية، وتما كانت تجربتو قصيرة بزاف (4 شهور) وفاشلة وداز بحال ما عمرو كان معاهم. من بعد غادي يصيفطوه للترجي التونسي (اللي كان فيه قبل ف2012)، ومع هاد الأخير غادي يبدا يبان ويتألق وربح معاهم ألقاب قارية، وهكذا غادي يعيطو ليه للمنتخب الجزائري قبل ما يربح معاهم كأس إفريقيا 2019.
مشاكل بلايلي وخفتو ماغاديش تسالي. وقعو ليه مشاكل كثيرة وتراجع مستواه فالخليج وخصوصا فالسعودية مع فرقة "الأهلي" اللي جاها ف 2019، قبل ما يمشي لقطر اللي باقي كيلعب فيها دبا.
ومن بعد الهدف اللي ماركاه ضد أسود الأطلس نهار السبت الفايت، فماتش ربع نهاية "كأس العرب قطر 2021′′، رجع ل"الواجهة" فصحافة بلادو وبعض القنوات العربية و رجعو كيتكلمو عليه كهداف وكأهم ركيزة فالمنتخب الدزايري.