المخرج السينمائي ادريس شويكة يكتب ل"كود": مهرجان مراكش ها الحفلة سالات ومن بعد ؟

ادريس اشويكة مخرج سينمائي //
ها الحفلة، ولى الحفلات، ديال الدورة 16 من مهرجان مراكش سالات، ومن بعد آ ش جا من وراها ؟ آش ستافدت لبلاد وعبادها ؟ آش ستافدوا المؤسسات ديالها ؟ آش ستافدت السوليما الوطنية ؟ آش ستافدوا لي خدامين فيها وعايشين منها وليها ؟..
دبا بانوا جوج ديال التوجهات عموما :
– صحاب "كولوا العام زين" بحال ديما، لي كيباركوا كلشي بلا تخمام، ولي كيتبعوهم كاع المطبلين والمغيطين والكارين حنكهم والجيش ديال لي مستفدين ولنتهازيين وخا ما عندهم علاقة بالسوليما…
– ومجموعة ديال السينمائيين والصحفيين المختصين والنقاد ديال بصح وخا كيتعدوا على رؤوس الاصابع، لي شافوا بلي المهرجان في هاد الدورة بعد بزاف على الأهداف دياله، وبلي لبلاد والسوليما ديالها ما كتستفد منه والو، زيرو في زيرو، وبلي لفرانسيس هما لي شادين كلشي وكيستافدوا من كلشي، هما ولي تابعينهم بلا ري ولا شوار ديال بصح، المدير ديال المركز السينمائي المغربي والباطرون ديال التلفزيونات المغربية…
وكاين بحال ديما اللأغلبية الساكتة لي كتشوف وتفرج من بعيد، ولي ما عندها ري ما معاها شوار !
وكاين أخيرا مجموعة ما هي من هادوا ما من هادوك، لي كيطرحوا تساؤلات وكيكولوا خاصنا نقلبوا على مكامن الداء باش لقاوا الدوا لي صالح ليه…
مبدئيا مزيان، ولكن بالنسبة لي كلشي باين، وكيف كيكولوا "شرح الواضحات من المفضحات".
هاد الشي ما يمكنش يتناطحوا عليه جوج عتارس ولا جوج كباش !
ونكولوا كاع وخا، ونقبلوا باللعبة كناس ديمقراطيين، ونتكلموا ونتناقشوا ونتشاوروا بيناتنا…
مهرجان مراكش مهرجان منظم من طرف المغرب، على أرض مغربية وبتمويل مغربي، وهاد الشي كيفرض، قانونيا وأخلاقيا وطبقا للتقاليد المتعارف عليها دوليا، باش تستفد منه بالدرجة لولى لبلاد ولعباد ديالها والمؤسسات ديالها والسوليما ديالها والناس لي كيشتغلوا فيها. كيف ما كيوقع في جميع بلدان العالم وأولهم فرنسا بجميع المهرجانات ديالها…
ومن الناحية الدولية خاص المهرجان يبقى منفتح على جميع السينمات في العالم، من آسيا حتى لأمريكا وأمريكا الجنوبية وأروبا وأروبا الشرقية وإفريقيا وأستراليا، ماشي غير فرنسا والأفلام لي كتشارك فيهم، وعلى أي كلشي كيعرف بلي السينما الفرنسية هي أضعف حلقة في السينما الأروبية، أما على مستوى العالم كتبقى على قد الحال وصافي…
وهاد الشي ما يمكنش يتناطحوا عليه جوج عتارس ولا جوج كباش !
هادا ما كان والسلام، ونخليكم على خير حتى للمرة الجاية.