المغاربة كشعب هادي حالتنا من ديما وفكاع المجالات ناس على قد الحال ، ماحناش عباقرة ولا مبدعين ولا فنانة بالفطرة أو الجينات ، حنا غير دراوش على هامش التاريخ والجغرافية

شي مغاربة عندهم واحد الصورة غالطة ومبالغ فيها على راسهم وعلى البلاد ككل ، فمن بعد العدوان الثلاتي ديال الستاتي وإيدار والمجرد، بزاف ديال الناس كالسين كينتاقدوهم وبلي مافن ما إبداع ما تلعبة داكشي ، على الاساس المغاربة أصلا مبدعين وفنانة وديما الإنتاجات فالمستوى وغير هاد المرة بانو هاد التلاتي بدون مستوى وصافي ، وفالواقع هادي هي الحالة ديالنا من شحال هادي ، فقط كاين أوهام ذهنية عند المغاربة على راسهم على أنهم قادرين يبدعو وينتجوا فن فالمستوى ، أما فالواقع القضية خارية عليها وأهم حاجة باش نتصالحو مع راسنا أننا نتقبلو أننا شعب مكلخ منذ قرون وعمرو كان عندنا أصلا شي فن وا إبداع ، من غير فنون السخرة والعبودية وبناء الأسوار العالية ونقشها ودفن لي بناوها فيها.
لي عطا الله والسوق هو هذا ، وهاد موجة التفاهة راه ماشي مقتاصرة غير على المغرب راه عالمية ، شوفو غير الفيديوكليبات لي محتلين التوندونس عالميا ، راه حتى هوما ماشي شي حاجة وغير تخربيق وتفاهة وكلمات جد عادية، الفرق لي كاين هو أنه برا الإنتاج عندهم متنوع والنيفو مهزوز حتى فالتفاهة وبغيتي العمق موجود عاوتاني ، حنا راه غير السوق الخاوي لي كاين ، وفالمقابل مكاين حتى شي إبداع فني يحمر لوجه موجه لكل فئة على حدا ، مكاين غير الخرية حدا ختها وفشتى المجالات من غير شي أنصاف مواهب وأنصاف إبداعات لي كيبانو شي حاجة واعرة غير حيث فالمغرب ، وراكم عارفين المعمشة وسط العميين كتبان كحلة العيون.
لذا علاش هاد التحامل على سعد ولا إيدار ولا الستاتي ، سعد والستاتي هادو فنانة كبار وهادي لا نقاش فيها ، حاتم مسيكين منشط البطولة حتى هو وقاضي بلي كاين ، وأصلا المغاربة كشعب هادي حالتنا من ديما وفكاع المجالات ناس على قد الحال ، ماحناش عباقرة ولا مبدعين ولا فنانة بالفطرة أو الجينات ، حنا غير دراوش على هامش التاريخ والجغرافية ، وهادشي لي طالع فاليوتوب حاليا من إبداعات الفنانة المغاربة راه هو جهدنا وهاداك غير وجهنا فالمراية لذا مكاين لاش نكرهو راسنا.