علاش نايض صداع بين ناس الشمال و السياح من المناطق الاخرى ؟ حيت بكل بساطة الشمال مافيهش التجهيزات الكافية لاستقبال وفود السياح كل عام ! السياحة راه كاتبغي لوطيلات و لوبيرجات و الطرقان كبار و العقلية ديال السيرفيس ! ماشي غي آجي و قول عندي سياحة !

كاين صراع كبير مؤخرا فوسائل التواصل الاجتماعي بين ناس ” الشمال” و ناس ” الداخل” ! فالمجموعات الفايسبوكية نتاشرات صور طرقان مسدودة و ليزومبوطياج و عباد الله كاتشكى بلي الكرا فالشمال وصل حتى لألف درهم لليلة فشقة فالسكن الاقتصادي ! ناس الشمال كايتشكاو من الزبل و الصداع ديال السياح و غلاء المعيشة و ناس ” الداخيل” كايتشكاو من النظرة لي كايشوفوهم بيها ” الشماليين” و گاليك علاش يكعاو ! علاش يتشكاو ! راه بالسياحة ديالنا باش كاينتاعش الشمال ! بفلوسنا باش كايتخلق الرواج ! و الصراع كبر على الاقل فوسائل التواصل الاجتماعي و من نقاش عادي تحول فبعض المجموعات لسبان و معيور بين هادو و هادوك !
السياحة قطاع مهم ! كاينين دول و مناطق فالعالم عايشين غير بالسياحة ! اقتصادات كبار واقفين على السياحة و كايعيشو فاش كاتعيش و كايموتو فاش كاتموت ! و لكن كأي قطاع اقتصادي ، صناعة ، فلاحة … السياحة حتى هي خاصها قوانينها و امكانياتها باش نقدرو نهضرو عليها بعدا ! ماشي غي حيت سميتها السياحة راه خاصها تمارس بطريقة عشوائية بوهيمية مخربقة ! راه ماشي غير آجي و كون عندك وجهة سياحية ! مايمكنش !و فأي بلاصة كاتكون غير مهيئة لاستقبال وفود السياح كايتخلق مشكل بين السكان الاصليين و السياح ! هادي حاجة معروفة و واقعة حاليا فبزاف ديال الوجهات السياحية فالعالم ! أزمة كبيرة كاينة فسانطوريني ! ففينيزيا ! فبرشلونة بين السكان و بين السياح ! ايه آ سيموحمد ! سان طوريني براسها لي كايجيو ليها ملايين السياح سنويا و لي كادخل بفضل هاد السياح لعاقة صحيحة هزات الراية البيضة و كاتشكى من الاعداد الهائلة للسياح و كاتقلب كيفاش تنقصهم حيت ماعندهاش المؤهلات الكافية لاستقبالهم ! برشلونة لي كايهربو ليها آلاف المغاربة سنويا باش يدوزو الكونجي و يتصورو و يلوحو فلانستاغرام حتى هي المجالس المحلية ديالها كايحاولو يلقاو حل لمشاكل الساكنة و لي مرتابطة بافواج السياح الهائلة لي كادخل المدينة ! فينيزيا فايطاليا ! وجهة العشاق ! تاهي آ سيدي قاليك غايفرضو فيها ضريبة ديال الدخول تقدر توصل تال عشرة اورو على السياح لي جايين فالباطو و الكار … علاش هادشي كامل ؟ حيت السياحة خاصها امكانياتها بعدا تكون موجودة ! خاصها مايكفي من الوحدات السكنية ! لوطيلات ! الريسطورات ! السناكات ! لوبيرجات ! خاصها مدن بطرق واسعة و عريضة باش ماتخنقش حركة السير ! خاصها سبيطارات باش يتعالجو دوك السياح ! خاصها طواليطات عمومية باش بنادم مايخراليكش فالزناقي ! خاصها الأمن و البوليس و عمال النظافة و قوانين مهمة باش تحمي الساكنة من الصداع و الوسخ و الزحام ….
ماشي غير آجي و دير السياحة ! و خلق السياحة ! و قول عندي ” وجهة سياحية ” ! هاد الصداعات واقعين فدول كبيرة لي عندها الامكانيات وا تخايل معايا نتا كيفاش غاتكون حالة الناس فالشمال لي مافيهش حتى الكوابن عموميين فين يخراو عباد الله لاشداتهم الخرية ! كيفاش بغيتو الساكنة مايطلعش ليها الدم و ماتتشكاش ؟ سي نورمال !
المغرب عندو امكانيات طبيعية هائلة باش يطور وجهات سياحية واعرة ! فالشمال ! كيما فالجنوب و لكن عدم تواجد هاد الامكانيات المادية و الاستثمارات الكافية هوا لي مامخليش السياحة تطور بالشكل لي يعود بالنفع على السكان المحليين.