إتشيكا شورو الحب اللول ديال الملك الحسن الثاني ماتت

الممثلة الفرنسية جانين بوليت ڤيريت المعروفة ب"إتشيكا شورو" ماتت الثلاثاء اللي فات، وفق ما قالت صاحبتها مصممة الأزياء المغربية فضيلة الجادي اللي ساكنة فالرباط.
كانت إتشيكا شورو، اللي تزادت فباريس عام 1929، وحدة من النجوم الصاعدين فالسينما الفرنسية فالخمسينات من القرن 20 وتصدرت عناوين الصحف بسبب علاقة الحب اللي كانت كتجمعها مع الأمير مولاي حسن، الحسن الثاني حسب ما كتبات مجلة "جون أفريك".
إتشيكا شورو كانت ممثلة مشهورة، تكتشفات عام 1953 ففيلم "Les Vaincus" ديال المخرج الإيطالي مايكل أنجلو أنتونيوني.
تلاقاو هي والحسن الثاني فمدينة كان الفرنسية ف 1956، فاش كان الأمير كيتعافى من شي مرض، وكان المغرب كيتفاوض على استقلالو. بجوج كان داك الساعة فعمرهم 27 عام.
وقالت "جون أفريك" انه واخا الصعوبة ديال علاقتهم، مافرقاتهم لا المسافة ولا السلطة.. بلعكس فالقصر كولشي كان عارف ان مولاي حسن عطى تعليمات للسفارة المغربية فباريس: "خاص يتم استقبال إتشيكا شورو فأي وقت وتوفر ليها خدمة دبلوماسية".
وديما حسب "جون أفريك"، كان مشبعها كادويات، كل سيمانة، كيسيفطلها الأمير المجوهرات التقليدية، والگاطو وغيرو... وغير كان كيقدر كيتلاقها، والى ماقدرش كيدوز ساعات كيهضر معها فالتليفون، وكيقولها: كنبغيك هنا وكنبغيك هناك.
https://www.jeuneafrique.com/1302488/politique/maroc-disparition-de-lactrice-francaise-etchika-choureau-premier-amour-de-hassan-ii/