شوكي رئيس لجنة المالية فمجلس النواب والقيادي التجمعي ل"كَود": ارتفاع أسعار بعض المواد الغذائية ماعندوش علاقة بالحكومة الجديدة وها كيفاش واجهات هاد الزيادات وها شنو موجدين مع الفرق البرلمانية

قال محمد شوكي، رئيس لجنة المالية والتنمية الاقتصادية بمجلس النواب، أن هادي أيام والنقاش نايض على مواقع التواصل الاجتماعية بخصوص ارتفاع أسعار بعض المواد الغذائية.
وشوكي أوضح في تصريح ل"كَود"، قائلاً: "بالرغم مَنْ داكشي اللي ممكن يَتْعاب على هد النقاش، إلا أنو غادي يكون فصالح الحكومة وغادي يخلي المواطن، يعرف شنو كدير وشنو قادرة دير فوحد السياق اللي هو صعيب بزاف، بحال هذا ديالنا، وكيفاش أنها غادي تقدر تسير المرحلة بنجاح".
وبخصوص ارتفاع أسعار بعض المواد الغذائية، يضيف شوكي: "فكما سبق لي وأكدت، فهو ماشي مرتابط بهد الحكومة اللي عمرها بالكاد واصل 5 شهر، بل أَنُّو بدا مع نهاية الفصل الأول من السنة الماضية، نتيجة التعافي للي عرفاتو الاقتصادات العالمية من أزمة كورونا وازدياد الطلب على المواد الأولية، الشي اللي خلق تخبط في سلاسل التوريد.. وهدشي قلناها قبل أشهر..، قلناه أثناء مناقشة قانون المالية فالبرلمان".
هاد الوضع، يقول القيادي البارز في صفوف التجمع الوطني للأحرار: "على عكس ما كيقول البعض، الحكومة ما بقاتش مكتوفة الأيدي قداموا، بل أنها واجهاتو بإجراءات وتدابير استباقية، من ضمنها أنها "احتفظات وعززات صندوق المقاصة ووجهتو لدعم اسعار بعض المواد الاستهلاكية ب17 مليار درهم، وعلقات الرسوم الجمركية على واردات المواد الاستهلاكية اللي عرفات ارتفاع فالأسعار".
وأبرز شوكي أن الحكومة خصصات دعم اضافي للمستوردين، مشيرا إلى أنها كتتبع وجود أي اختلال أو مضاربة فالسوق.
رئيس لجنة المالية بالغرفة الأولى زاد موضحا: "بلا هادشي الحكومة والفرق البرلمانية غادي تدارس فالأيام الجاية إجراءات أخرى ممكن أنها تتخذها لتعزيز استقرار أسعار المواد الاستهلاكية، وغادي تكون الحكومة عند حسن ظن المواطنين بها فما يخص هذ الموضوع".