5 سنين وهو شاد عليها فبرطمة ودايرها عبدة جنسية ديالو.. جاك بوتيي واحد من اغنى الناس ففرنسا ومول شركة كبيرة ديال التأمين عندها فرع فطنجة "Euro-assurance" تعتاقل بسبب اغتصاب قاصر مغربية والاتجار بالبشر

اعتقلت السلطات الفرنسية، نهاية السيمانة اللي فاتت، جاك بوتيي Jacques Bouthier، رجل أعمال ومول شركة التأمين "Assu2000" اللي عندها فرع فطنجة سميتو "Euro-Assurance"، بتهم الاتجار بالبشر واغتصاب قاصر فايت سنها 15 العام.
وحسب وسائل إعلام فرنسية منها "RTL" اللي فجرات القضية، جاك بوتيي، اللي كيتعتابر واحد من اغنى الناس ففرنسا، متهم بالاتجار بالبشر ضد القاصرين، وتدار فالحبس الاحتياطي من السبت اللي فات.
وحسب نفس المصادر، القصة بدات من بعد شكوى حطاتها بنت من اصول مغربية فعمرها 22 عام، فمركز بوليس باريس، فمارس اللي فات، قالت فيها انها كانت تقريبا اسيرة عند بوتيي لمدة 5 سنوات، وكان كيغتاصبها..
ووضحات لهم ان بوتيي قالها: "صافي نتي وليتي كبيرة بزاف بالنسبة ليا، وخاصك تقلبيلي على وحدة صغيرة نبدلك بيها". وهنا جابت ليه قاصر رومانية فعمرها غير 14 العام باش تاخد بلاصتها.
وفاش جابت البنيتة لهاد السيد اللي فعمرو 75 عام، قدرات تصورهم فالفراش وهو ناعس مع القاصرة، وعطات الفيديو للبوليس، وفتحو تحقيق.
ومن التحقيق ديال البوليس، تبين ان البنت كانت تحت تأثير جاك بوتيي وخايفة منو. وتبين كذلك انها فقيرة ماعندها موارد وماعندها اللي يعاونها او يعتقها.
وبوتيي هو رئيس مجموعة "Assu 2000" اللي ولات سميتها مؤخرا "Vilavi"، واللي اسسها ف 1975 فاش كانت فعمرو 28 عام. وكتقدم راسها كأول وسيط خبير فالتأمين والائتمان ففرنسا.
ودابا كاينة هضرة على انه عندو حتى ضحايا مغربيات كانو خدامين فالفرع ديال الشركة فطنجة..
وغادي ترجع "كود" لهاد الموضوع بتفاصيل اكثر وشهادات..