شابع ذكورية حتى هو.. إيلون ماسك: كنولد الولاد باش نعاون فمواجهة أزمة نقص السكان! – تغريدة

كشفات تقارير إعلامية بللي الملياردير الميريكاني إيلون ماسك ولا أب ل9 ديال الأطفال، وبللي تزادو عندو توام فاللخر ديال 2021، و ماماهم هي مسؤولة تنفيذية كبيرة فالشركة ديالو المختصة فمجال الذكاء الاصطناعي "نيورالينك".
موقع "إنسايدر" الميريكاني قال بللي وثائق ديال المحكمة بينات أن ماسك ومسؤولة تنفيذية خدامة معاه سميتها شيفون زيليس، قدمو طلب باش يبدلو سميت التوام ديالهم باش يضمنو الكنية ديال باباهم وماماهم بجوج.
وكشفات التقارير أن أم التوام ولداتهم فشهر نونبر عام 2021، قبل سيمانات قليلة من الولادة ديال مرات ماسك لولدهم الثاني.
وهكذا ولى ماسك دابا أب لتسعود ديال الوليدات، جوج من مراتو السابقة المغنية الكندية كَرايمز، و5 من مراتو السابقة الكاتبة الكندية جوستين ويلسون، ثم التوام من زيليس.
وعلق إيلون ماسك بطريقة غير مباشرة على تسريب خبر وصول عدد ولادو لتسعود، نهار الخميس، فتغريدة ف"تويتر"، وقال: "معدل الولادات طايح بزاف، والحضارة البشرية كتواجه هاد الخطر، داكشي علاش كندير مجهود من جيهتي باش نعاون فمواجهة أزمة نقص السكان".