وزيرة الانتقال الطاقي احتقرات البرلمان وكذبات: عمرني قلت المغرب مامحتاجش لاسامير.. وقبل جوج سيمانات: المغرب مامحتاجش لاسامير

ليلى بنعلي وزير الانتقال الطاقي والتنمية المستدامة، من نهار تعينات باسم حزب الأصالة والمعاصرة، وهي كادير خرجات إعلامية مخربقة، وكولشي كيتذكر فاش قالت بلي هاد الحرب لي كاينا ف أوكرانيا والارتفاع فالأسعار دوليا مغاديش يأثر على الأسعار داخليا.
هاد المرة بغات تكحلها وهي تعميها فموضوع حساس وسيادي وفيه مشكل قضائي مع مستثمر سعودي، لي كيتعلق بلاسامير، بحيث صرحات قبل أسبوعين بلي المغرب مامحتاجش لاسامير. فبرنامج حديث مع الصحافة لي كينشطو الإعلامي عبد الترابي.
لكن فجلسة الأسئلة الشفوية بمجلس النواب لي كانت مساء الاثنين 18 يوليوز، فاش سولوها البرلمانيين كيفاش انقلبتي فكلامك بين عشية وضحاها، كذبات بوجه حمر وقالت عمرني قلت بأن المغرب ما مجتاجش لاسامير.
هاد الوزيرة ماعندها تا دعم من حزبها، فريقها البرلماني مكيدعمهاش نهائيا، بل كاين حديث عن غضب قيادة البام عليها بسبب عدم قدرتها على اتخاذ أي إجراء بخصوص إشكالات تتعلق بتنظيم مجال الطاقة خصوصا المحروقات.