تبريرات غبية ومواضحاش..بنعرفة اللي جابوه بالانقلاب الداخلي باغي يغطي الشمس بالغربال فقضية استثناء بنكيران من زيارة وفد حماس

من نهار دارو الانقلاب الداخلي وجابوه صحابو بلاصت بنكيران والسياسة غاديا لور لور، سعد الدين العثماني، الأمين العام الحالي لحزب العدالة والتنمية، لبارح فخرجة اعلامية جديدة بان "ضعيف" وتبريراتو "غبية" غير مقنعة خصوصا فقضية استنثاء بنكيران من زيارة وفد حماس.
التبرير الغبي لللي دار بنعرفة، هو فاش جاوب صحفي سولو على إقصاء عبد الاله بنكيران من لقاء إسماعيل هنية، وقال بلي :"كاينا لجنة معينة من طرف الامانة العامة للإشراف على هذه الزيارة وتحديد برنامجها، مؤكدا بأن الإجراءات الأمنية كانت العامل الرئيسي والمحدد للقاءات وفد حركة حماس.
دبا هاد بنعرفة باغي يلصق تعديل البرنامج واقصاء بنكيران من اللقاء بالوفد للإجراءات الأمنية، وهو عارف بلي وفد حماس جا فطائرة خاصة وفرحلة خاصة، وعارف بلي قبل مايمشي هنية والوفد ديالو، زارو مصطفى الرميد.
تبرير بنعرفة قال بلي جميع اللقاءات دارت ف فندق بالصخيرات، باستثناء اللقاء اللي كاين فمنزل رئيس الحكومة.
الصحفي سول بنعرفة كيفاش زيارة الوفد للرميد، جاوبو بلي هاديك زيارة استثنائية حيث كانت فكازا.
بنعرفة بالوضوح اللي معندوش، بالنسبة ليه الرباط بوحدها وكازا بوحدها، مع العلم ان وفد حماس ممكن يسافر من مطار سلا، ماشي بالضرورة كازا.
وعلق بنعرفة على زيارة الفود للرميد، بالقول :"هاديك فالدار البيضاء اثناء المرور الى المطار بغاو يتغداو واختارو يتغداو عند الرميد. هادشي فكازا".
دبا باغي يقول الاجراءات كانت غير فالرباط، وكازا لا. تبرير غبي بزاف.. وهو عارف بلي من نهار دار تيار الاستوزار الانقلاب على بنكيران، هوما كيحاصروه وكيحاربوه، حاربوه فالاعلام ديال الحزب، وحاربوه بقوة، لسبب بسيط هو أن بنكيران كيعرف حقيقتهم وقوالبهم.