دخل الدولي المغربي السابق فكرة اليد هشام حمادي فالجامعة الملكية المغربية لكرة اليد، بسبب السقوط ديال المنتخب الوطني المغربي فالمباراة لي جمعاتو بمنتخب السعودية فدورة ألعاب التضامن الإسلامي والاقصاء ديالو من المنافسة. وما ترددش اللاعب السابق للمنتخب المغربي ديال كرة اليد فالتعبير على الغضب ديالو من الطريقة لي كيتم بها تسيير اللعبة فالمغرب، وقال بعد سقوط المنتخب أمام السعودية فتدوينة نشرها على فيسبوك: "ها علاش كيبقى فيا الحال يا هاد الناس وكنتكلم وندافع على هاد الرياضة اليتيمة لي معندها لا أب لا أم لي يدفعوا عليها بغيرة واحترافية الي هوما الجامعة ديالنا". وقال حمادي أيضا أن الناس ديال الجامعة: "مزالين كيتسناو اللاعبين والمدربين يصنعوا المعجزات و يصنعوا راسهم براسهم ! كل الاحترام والتقدير للاعبين المدربين ديالنا لي عطاو داكشي لي فجهدهم وتقاتلو على الراية المغربية، ونتوما اصحاب القرار عطلة سعيدة والعام طويل لي بغا اربح، وموعدنا بطولة العالم" للإشارة فالمنتخب الوطني المغربي لكرة اليد ودع منافسات دورة ألعاب التضامن الإسلامي، بعد السقوط ديالو أمام منتخب السعودية فالجولة الثانية من المنافسات بنتيجة 29 مقابل 25.
