غيسافر فريق الوداد الرياضي هذا الاسبوع لمدينة وجدة ومنها للسعيدية ثم بركان، حيث غيدا المباريات ديالو الودية الإعدادية للموسم الرياضي لي جاي، يوم الأحد المقبل. وغيشارك الوداد الرياضي فدوري النتيفي الودي لي غيتقام هاذ المرة خارج الدارالبيضاء وبثلاثة ديال المدن مغربية، وكيتعلق الأمر بالملعب الشرفي ديال وجدة والمركز الجهوي ديال السعيدية والملعب البلدي ديال بركان. الوداد الرياضي غيبدا المشاركة ديالو فدوري النتيفي بالماتش لي غيلعبو ضد فريق مولودية وجدة فوجدة يوم الأحد المقبل، ومنها غينتقل للسعيدية باش يلعب ضد الراسينغ البيضاوي يوم الأربعاء من الأسبوع المقبل، وغيواجه فالمباراة الأخيرة فريق نهضة بركان فبركان يوم السبت ديال الأسبوع المقبل. ومن المنتظر باش يقود بدر القادوري المدير التقني ديال الوداد الرياضي الفريق الأحمر فدوري النتيفي، حيث المدرب الحسين عموتة لي تم الاتفاق معه على تدريب الفريق عندو التزام مع المنتخب الوطني المغربي المحلي فدوري دولي بالنمسا، مع العلم أن الوداد غيبدا غدا التحضير ديالو الموسم المقبل. للإشارة وكيفما كشف "كود" فوقت سابق فالنسخة34 من دوري الراحل أحمد النتيفي غتعرف مشاركة 4 ديال الفرق وطينة، وهي الوداد الرياضي بطل المغرب وإفريقيا ونهضة بركان بطل كأس العرش وكأس الكونفدرالية الإفريقية ومولودية وجدة وفريق الراسينغ البيضاوي.
