استنفار أمني فكازا باش ينجح الديربي

كتعرف مدينة الدار البيضاء وبالضبط منطقة المعاريف اللي كيتواجد فيها تيران المركب الرياضي محمد الخامس وسط كازا، استنفار كبير ديال الأمن استعدادا لماتش الديربي بين الوداد والرجاء اللي غادي يتلعب اليوم الأحد ضمن مؤجل الجولة 6 من منافسات البطولة الاحترافية لكرة القدم.
وكيعرف محيط ستاد دونور انتشار أمني كبير وحواجز أمنية منذ صباح اليوم الأحد، وهاذشي لتأمين الممرات المؤدية للتيران وضمان ولوج الجمهور بشكل سلسل إلى المركب، ومرور الحدث الرياضي فأحسن الظروف وتأمين سلامة المواطنين سواء كانوا من جمهور الفريقين اللي جايين يتفرجو أو السكان جيران التيران.
وغادي يبدا الماتش ما بين الوداد والرجاء مع 4 عصرا اليوم الأحد، ومن المنتظر يعرف حضور كبير من جمهور الفريقين للتيران خصوصا وأن الديربي ديال اليوم هو أول ديربي غادي يكون فيه الجمهور من بعد 3 السنوات، فغاب الجمهور فالديربيات اللي فاتت بسبب جائحة كورونا وأيضا بسبب عقوبة الويكلو.