أجواء حماسية فتداريب المغرب قبل ماتش كرواتيا.. اللعابا واجدين وبوفال سلاح الركراكي للرباح

كتعرف تداريب المنتخب الوطني المغربي قبل ماتش كرواتيا فأول تحدي للأسود فكأس العالم أجواء حماسية مرتفعة، وتركيز كبير من جميع العناصر واللعابا كاملين واجدين باش يقدمو ماتش كبير ضد مودريتش وصحابو.
المنتخب الوطني المغربي دار حصة تدريبية هاد الصباح فتيران الدحيل فقطر وحدد لها وليد الركراكي الساعة 11 نهار كموعد للانطلاقة ديالها، وعرفت الحصة قبل البداية ديالها زيارة من باتريس موتسيبي رئيس الاتحاد الإفريقي لكرة القدم وفوزي لقجع رئيس الجامعة الملكية المغربية، اللي حفزو اللعابا باش يقدمو عروض قوية فكأس العالم ويشرفو المغرب والقارة الإفريقية.
وبالنسبة للعابا ديال المنتخب الوطني المغربي فكانوا كاملين حاضرين فالحصة التدريبية وتفاعلوا بشكل إيجابي مع ميساج رئيس الكاف، وكانوا مركزين وعارفين المسؤولية اللي عليهم حيث غادي يدافعو على التوني ديال المغرب وعلى القارة السمرا.
الحصة التدريبية عرفت مشاركة جميع اللعابا ديال المنتخب الوطني المغربي فحال سليم أملاح اللي كانت معلومات كتشكش بلي غادي يلعب ضد كرواتيا بسبب الإصابة ولكن تدرب مع صحابو بشكل عادي اليوم، والحصة عرفت مشاركة حتى زكرياء أبو خلال وعبد الصمد الزلزولي اللي كانوا يتدربو بوحدهم فالأيام اللي فاتت.
الناخب الوطني وليد الركراكي كيركز بشكل كبير على التواصل مع العناصر الوطنية وقريب بزاف من اللعاب وعرفت الحصة التدريبية ديال اليوم واللي ختار لها هو الساعة 11 موعد لبدايتها، حديث منفرد ما بينو وبين سفيان بوفال، وهادشي لاحظوه الحاضرين الشي اللي كيبين القيمة ديال اللعاب فليكيب ناسيونال واللي كيأكد بلي غادي يكون عندو دور كبير فالماتش الجاي ضد كرواتيا من الناحية الهجومية، مع العلم أن الركراكي كيخدام معاه بزاف باش يحول الإمكانيات الفردية اللي عندو لمصلحة لكروب باش وهادشي بأن بزاف فاخر ماتش ديال ليكيب ناسيونال ضد جورجيا ومن الفرص اللي خلق لصحابو.
للإشارة فهادي هي أول حصة تدريبية ديال المنتخب المغربي اللي كيبرمجها وليد الركراكي فنفس التوقيت الي غادي يتلعب فيه الماتش الأربعاء الجاي ضد كرواتيا مع 11 نهار، وهاد الماتش مهم بالنسبة ليكيب ناسيونال للذهاب لإبعاد نقطة فكوب ديموند مع العلم أن المغرب غادي يلعب من بعد كرواتيا مع بلجيكا الأحد الجاي وبعدها كندا، الشي اللي كا يعني بلي 3 النقاط من رباح على لوكا مدريتش وصحابو مهمة وعندها قيمة كبيرة المنافسة فالكروب 6 على التأهل للدور الثاني.