المغرب غادي يلعب ضد فرنسا بطلة العالم فنصف نهائي مونديال قطر

غادي يلعب المنتخب الوطني المغربي فنصف نهائي كأس العالم قطر 2022، ضد منتخب فرنسا بطلة العالم 1998 و 2018، اللي تأهل اليوم السبت من بعدما ربحت الننكليز فربع نهائي البطولة.
وربحت فرنسا الننكليز بنتيحة 2 لواحد، وكانوا الفرنسيين الأولين اللي سجلوا بواسطة أوريلين تشاوميني فالدقيقة 17، وجابو الننكليز التعادل عن طريق هاري كين فالدقيقة 54 من بيلانتي، وقدرت فرنسا تقدم فالنتيجة بواسطة اوليفي جيرو بهدف ثاني فالدقيقة 78، ومن عبدها غدا تجي لننكليز فرصة تعديل النتيجة من بيلانتي فالدقيقة 83 ولكن هاري كين ضيعها هاد المرة وصيفطها فوق المرمى الفرنسي وبقات النتيجة كيفما هي حتى سالا الماتش.
وبهاد الرباح تأهلت فرنسا لنصف نهائي كأس العالم قطر 2022، وغادي تلعب ضد المغرب واللي تأهل من بعدما ربح البرتغال فربع النهائي بواحد لزيرو، وغادي يتلعب الماتش ما بين المغرب وفرنسا حاملة اللقب يوم الأربعاء المقبل فتيران "البيت" مع 8 الليل ديال التوقيت المغربي، والفائز فيهم غادي يتأهل للفينال والخاسر غادي يلعب على المركز الثالث.