بودريقة خرج يجوب اللي تاهموه ببيع تيكي ماتش المغرب وفرنسا ووصفهم بأعداء النجاح

تبرأ محمد بودريقة من الاتهامات اللي توجهت له من طرف عدد كبير ديال الجماهير المغربي بخصوص التورط فمشاكل توزيع تذاكر مباراة نصف نهائي كأس العالم قطر 2022 ، ما بين المنتخب الوطني المغربي وفرنسا وهي التذاكر اللي ترحمت منها عدد الجماهير وكاين فيها اللي خلص الطيارة وسافر لقطر وما لقاش باش يدخل للتيران وكاين اللي تلغات له الرحلة الجوية وبقى فالمغرب.
محمد بودريقة العضو بالجامعة الملكية المغربية لكرة القدم واللي كانت عندو مهمة توزيع تذاكر ماتش المغرب وفرنسا على الجمهور المغربي ختار الساعة الأخيرة الساعة الأخيرة قبل المباراة باش يخرج يوضح الموقف ديالو من الاتهامات اللي توجهت له من طرف المشجعين المغاربة وقال فيسبوك ف "بلاغ هام" حسب التعبير ديالو: "خلافا لما يتداوله بعض الأشخاص و أعداء النجاح فيما يخص توزيع تذاكر مقابلة المنتخب الوطني و المنتخب الفرنسي فقد تسلمت من الجامعة الملكية المغربية على دفعتين الأولى 6000 تذكرة سلمت إلى منظمين مباشرة بعد تعدادها في الملعب الجنوبي كنت اشرف عليها مع السلطات القطرية مشكورة و الدفع التانية 1000 تذكرة سلمت مباشرة لمسؤولي السفارة في المطار الدولي للدوحة للتوزيع للقادمين من الدار البيضاء نفس الشيء بتنسيق مع السلطات القطرية و به وجب الإعلام ما قمت به هو واجب مني اتجاه المغاربة لا انتظر لا جزاء و لا شكور".
وحملت الجماهير المغربية مسؤولية الارتباك اللي وقع خلال عملية توزيع تذاكر الماتش التاريخي ما بين المغرب وفرنسا فنصف نهائي كأس العالم قطر 2022، للعضو الجامعي محمد بودريقة وكاين اللي وصل به الحد على مواقع التواصل الاجتماعي لاتهام بودريقة ببيع التذاكر فالمارشي نوار.