مونديال قطر.. مشجعين مغاربة مقلقين من طريقة توزيع تذاكر ماتشات المنتخب وكيطالبو لقجع يتدخل

خلقت الطريقة اللي تم بها توزيع تذاكر ماتش المنتخب الوطني المغربي ضد البرتغال فربع نهائي كأس العالم قطر 2022، وقبل منو الماتش ضد إسبانيا فثمن النهائي جدل كبير وسط الجمهور المغربي بالرغم من المجهودات الكبيرة اللي قامت بها الجامعة الملكية المغربية لكرة القدم برئاسة فوزي لقجع من أجل توفير ليتيكي للمشجعين المغاربة.
عدد كبير من المغاربة سوا اللي كاينين فقطر أو اللي عندهم نية يمشيو لها باش يساندو المنتخب الوطني المغربي فدومي فينال ضد فرنسا الأربعاء المقبل فتيران البيت فالعاصمة القطرية الدوحة، وبمجرد ما سالا الماتش ضد البرتغال تخلطت عليهم فرحة التأهل مع ستريس الحصول على تذكرة مباراة نصف النهائي، اللي بالرغم من المجهودات اللي قام بها فوزي لقجع فتوفير التذاكر من عند الفيفا، كانت مشاكل فتوزيعها ومجموعة من المشجعين المغاربة ما راضينش على الطريقة اللي كيتفرق بها التيكي.
وتشكاو عدد من المحبين للمنتخب الوطني المغربي من توزيع التذاكر بالكميات على أشخاص مقربين من أعضاء جامعيين وشي وحدين محسوبين عليهم فالماتش الماضي ضد البرتغال عن ربع نهائي كأس العالم واللي تلعب فتيران الثمامة فالعاصمة القطرية الدوحة، واستغربو من السبب اللي كيخلي أشخاص بالضبط يتم تفضيلهم ويتعطى لهم التيكي وبالعدد قبل من مشجعين آخرين اللي كل واحد فيهم كيحلم ويتمنى يتوفر على تذكرة واحدة فقط وقانع بها باش يوقف مع ولاد بلادو فالتيران نهار الماتش، ويساند المنتخب الوطني المغربي اللي هو ملك لجميع المغاربة، وخصوصا ان جامعة الكرة سخرت جميع الإمكانيات باش تضمن حضور أكبر عدد من الجمهور المغربي لدعم ليكيب ناسيونال فالتيران.
مجموعة من الجماهير المغربية طالبت فوزي لقجع رئيس الجامعة الملكية المغربية لكرة القدم باش يتدخل لمعالجة طريقة توزيع تذاكر الماتش الجاي ديال المنتخب الوطني المغربي ضد فرنسا فنصف نهائي كأس العالم، ويتم وضعها على الموقع الإلكتروني الخاص بالاتحاد الدولي لكرة القدم "الفيفا"، وما يتكلف بها حتى شي طرف محسوب على جامعة الكرة، وكل واحد من المشجعين المغاربة بغى يتحصل على تذكرة الماتش يدخل لموقع "الفيفا" وياخدها، وكيشوفو بلي هاد الطريقة هي الحل باش يكون ضمان تكافؤ الفرص فالحصول على تذكرة الماتش سوا كانت بالفلوس أو مجانية.
وكتجي مطالب الجمهور المغربي اللي شغوف بمتابعة المنتخب الوطني المغربي وباغي يوقف مع وليد الركراكي و وليداتو فنصف نهائي كأس العالم، على بعد 3 أيام تقريبا من الماتش ضد المنتخب الفرنسي، اللي من المنتظر تحضر له الجماهير الفرنسية بقوة حتى هي باش تشجع منتخب بلادها، وراه البارح ضد الننكليز فربع النهائي كانوا حاضرين بكثرة فتيران "البيت" الشي اللي كيخلي الجامعة الملكية المغربية لكرة القدم من جديد أمام 2 تحديات، الأول كيتمثل فتوفير أكبر عدد من تذاكر الماتش المصيري ضد الفرنسيين، والثاني فطريقة توزيعها على المشجعين المغاربة بطريقة كتضمن تكافؤ الفرص ما بين ولاد الشعب المغربي بلا وجهيات.
للإشارة فالماتش الماضي ما بين المنتخب الوطني المغربي والبرتغال عن ربع نهائي كاس العالم قطر 2022، كان العضو الجامعي محمد بودريقة هو اللي مكلف بتوزيع التذاكر على الجماهير المغربية قبل الماتش، ورغم المجهودات الكبيرة اللي قامت بها الجامعة الملكية المغربية لكرة القدم برئاسة فوزي لقجع لتوفير التذاكر للمغاربة، إلا أن عدد من الجماهير المغربية تشكات من الطريقة اللي توزعت بها التذاكر وما عجباتهاش وطالبت باش الماتش المقبل يبدا التيكي يتحط فالموقع الإلكتروني الخاص بالفيفا باش اللي سبق ياخد التذكرة ديالو وما يطمعش فكثر منها.