الإصابات كتزيد تعذب الرجاء و 2 لاعبين غيتحرم منهم الفريق فالماتشات الجايين

كتزيد الإصابات تأزم الوضع الصعب اللي كيعيشو، فريق الرجاء الرياضي، منذ بداية هذا الموسم، بسبب ضعف التركيبة البشرية ديال الفريق اللي صبحت الشكوك كتحوم بشكل كبير على القدرة ديالو فالمنافسة على البطولات المحلية والإفريقية، خصوصا فظل المنع المفروض عليه باش مايقومش بانتدابات بسبب النزاعات اللي عليه.
وكشف مصدر مطلع أن مروان هدهودي اللي توعت فالماتش البارح ضد أولمبيك خريبكة غيكون غايب فليماتش ديال الخضرا الجايين بداية بمواجهة اتحاد طنجة الجمعة المقبل فالبطولة، حيث عندو خلع فالكود ديالو وغيدير فحصوصات طبية جديدة باش يتعرف نوع العلاج اللي غيتعطى له ومدة الراحة اللي غيبرك مع العلم أنه لاعب أساسي فدفاع الرجاء.
وإلى جانب مروان هدهودي فحتى الظهير الأيمن محمد الناهيري موعت فالركبة ديالو، وحتى هو غادي يغيب على الرجاء لمدة 3 أو 4 ماتشات اللي جايين على الأقل باش يرتاح ويبرا، مع العلم أن الناهيري حتى هو لاعب أساسي وكيعتمد عليه المدرب منذر الكبير.
وكيعيش الرجاء الرياضي وضع صعب بزاف بسبب المنع من الانتدابات، وهذا الكابوس عندو حل واحد هو أن عزيز البدراوي يحل مشكل النزاعات المقدرة بحوالي 580 مليون اللي على الفريق ويخلص اللاعبين والمستخدمين بالنادي ويقدم ضمانات على أن ميزانية الخضرا بخير من هنا حتى لنهاية الموسم، باش يقدر ياخد موافقة من الجامعة الملكية المغربية لكرة القدم لدخول الميركاتو وهادشي من غير لفلوس اللي غتحتاجها صفقات التعاقد مع لاعبين جداد، خصوصا وأن الكل صبح كيعرف الوضع المالي ديال الفريق، وبالتالي أي لاعب غيبغي يجي لوازيس غيشترط يتوصل بالمستحقات ديالو هي الأولى فحال بريم سينياتير ويضمن ياخد الصالير ومنح المباريات فالوقت دون تأخر.