البدراوي مطالب بتوفير فلوس النزاعات قبل التوقيع مع لاعبين جداد

كيتعتبر الرجاء الرياضي من الفرق المهددة بالحرمان من الانتدابات خلال الانتقالات الشتوية المقبلة، بسبب النزاعات مع لاعبين سابقين، والمشكل هو أن الفريق الأخضر محتاج بزاف يدعم الصفوف ديالو وهذا بشهادة مدرب وصيف بطل المغرب منذر الكبير.
الرجاء الرياضي فحال عدد من الأندية المغربية ملزم بحل مشاكل النزاعات مع عدد من اللاعبين السابقين واللي كيطالبو بالمستحقات ديالهم اللي مازال فذمة إدارة النادي، وهادشي كانت حاسمة فيه الجامعة الملكية المغربية لكرة القدم والعصبة الوطنية لكرة القدم الإحترافية الاجتماع الأخير للمكتب المديري الجامعة مع جميع الأندية المغربية، وماشي غير مع الرجاء والفريق اللي بغى يدير انتخابات فالميركاتو المقبل خاصو يسوي الوضعية المالية ديالو.
صحيح أن المكتب المديري ديال الرجاء الرياضي حاول يحل مجموعة من المشاكل المالية، وقدر عزيز البدراوي رئيس الخضرا يوصل لاتفاق مع عدد من اللاعبين السابقين لحلول سوا بحل المشكل بشكل نهائي أو ياخدو مستحقاتهم بليطرونش وقدر يؤمن المستحقات ديال اللاعبين الحاليين والمستخدمين بالنادي ويوفر لهم ليصالير ديالهم، ولكن كاينين نزاعات اخرى اللي كتهدد الفريق باش ما يديرش انتدابات فالانتقالات الشتوية المقبلة.
الرجاء الرياضي مطالب بتوفير مبلغ 580 مليون وهي قيمة النزاعات اللي على الفريق، والبدراوي والمكتب ديالو ملزم يلقى لها السيولة المالية الكافية باش يسددها ويسمح للفريق إداريا على الأقل يقوم بالانتدابات، وهادشي من غير أن التوقيع مع لاعبين جداد كيتطلب مبالغ مضاعفة على المبلغ المذكور خصوصا أن سوق انتقالات اللاعبين بالمغرب صبح غالي، والعرض اقل بكثير من طلب والمنافسة شرسة ما بين الفرق على الانتدابات.
الماتش الكارثي اللي قدم الرجاء الرياضي ضد المغرب الفاسي يوم أمس الثلاثاء فتيران المركب الرياضي محمد الخامس قدام الجمهور ديالو، زاد أكد أن التركيبة البشرية ديال الخضرا محدودة بزاف وما غاديش تقدر تنافس على الألقاب هاد الموسم، وأن عزيز البدراوي رئيس النادي خاصو يلقى الحلول العاجلة وهادشي بتأكيد من مدرب الفريق منذر الكبير اللي خرج بتصريح قوي من بعد التعادل المخيب للرجاويين مع الماص زيرو لزيرو، وعلنها وقال أن الفريق كيعاني وخصوصا على مستوى الهجوم وما عندوش نجاعة ومطالب خلال الميركاتو المقبل باش يدير انتدابات.