مبلغ ضعيف جمعو البدراوي فأول يوم من الصينية وعزوف الرؤساء السابقين والمنخرطين لانعدام الثقة

عرفت الصينية اللي خرج عزيز البدراوي رئيس الرجاء الرياضي، ليلة الأحد الماضي، لعشاق الفريق باش يجمع فلوس التبرعات لحل أزمة النادي، من بعدما عجز بوحدو على ذلك، (عرفت) تفاعل محتشم وبزاف من عشاق الفريق الأخضر.
ومن بعد مرور 24 ساعة على إطلاق الصينية ديال عزيز البدراوي واللي سماها "الرجا معانا وحنا معاها"، وهو شعار جماهير الرجاء فمحاولة لاستعطاف الأنصار ديال الخضرا، كانت التفاعل معه محتشم بزاف والأرقام كانت ضعيفة ولم يتجاوز المبلغ اللي تجمع 26 مليون.
واقتصر الانخراط فجمع لفلوس لصينية البدراوي على بعض من الجمهور، أمام غياب الرؤساء السابقين والمنخرطين اللاعبين السابقين وأيضا الفنانين والمشاهير اللي معروفين بحبهم للرجاء، وهادشي فسروه المتتبعين لانعدام الثقة فالمكتب المديري الحالي ديال النادي اللي كيترأسو عزيز البدراوي، خصوصا وأن الأخير النهار الأول ملي بغا يشد الرئاسة قدم وعود بأنه غيحل مشاكل الرجاء، وأنه مول الشكارة الملياردير اللي غيستثمر فلوسو فالنادي ويجيب لاعبين كبار باش الفريق يربح الألقاب، ولكن حتى حاجة من هادشي ما وقعت بل على العكس زادت تأزمت وضعية الرجاء وأصبحت عاجزة فعهد البدراوي على تسديد مبلغ 518 مليون لرفع المنع من الانتدابات.