برلمان الرجاء كيغلي بسبب صينية البدراوي والأخير عرض على المنخرطين يسيرو لجان النادي لامتصاص غضبهم

قرر عزيز البدراوي رئيس الرجاء الرياضي يمتص غضب المنخرطين ديال النادي من السعاية اللي طلق بالصينية باش يجمع فلوس من الجمهور لحل أزمة النادي، من بعدما عجز على فك النزاعات المالية ديال الفريق المهدد بالحرمان من الانتدابات، وبغى يغري عدد من المنخرطين بالانضمام للجان تسيير بالنادي.
وناض المكتب المديري للرجاء الرياضي برئاسة عزيز البدراوي، ومن بعد ساعات فقط على إطلاق مبادرة "الرجاء معانا"، ودعا المنخرطات والمنخرطين بالنادي للانضمام للجان ديال المكتب، تحت غطاء وشعار إشراك وتفعيل مؤسسة المنخرط بالنادي، كل واحد حسب التخصص ديالو.
وحسب مصدر رجاوي، فخطوة عزيز البدراوي كتجي لامتصاص غضب برلمان الرجاء الرياضي والمنخرطين اللي ما عجبهومش طريقة تسيير النادي فالمرحلة ديالو، وزاد الغضب ديالهم من بعدما خرج الصينية الجمهور باش يجمع فلوس للفريق وهادشي دليل على أنه عاجز على حل الأزمة، وأكد نفس المصدر، أن المنخرطين نافرين منو وحتى اللي كانوا متعاطفين معه رجعو اللور حيث الثقة اللي كانوا واضعين فيه مشات.