واش البدراوي غيدخل تاريخ الرجاء كأول رئيس يدير الصينية؟ .. مصدر رجاوي: صعيب المنخرطين يوافقو حيث الخضرا ماشي ديال السعاية

صبح رئيس الرجاء الرياضي عزيز البدراوي مرشح لتحقيق سابقة فتاريخ النادي وهي فتح باب التبرعات لجمع لفلوس بشكل مباشرة من عند جمهور الفريق، لحل الأزمة المالية ورفع المنع من الانتدابات اللي مفروض عليه من طرف الجامعة الملكية المغربية لكرة القدم والاتحاد الدولي للعبة، واللي خاص يخلص فيها 580 مليون.
وحسب المعلومات الواردة من محيط الرجاء الرياضي ومن بعدما كشف المنخرط السابق بالنادي سمير شوقي فالفيسبوك ديالو بلي رئيس الفريق عزيز البدراوي قاله أنه غادي يطلق بعد 48 ساعة مبادرة جديدة من اجل مساهمة كل الرجاويين اشخاص و شركات عبر منصة خاصة، فكشف مصدر رجاوي مطلع أن الأعضاء ديال مكتب البدراوي ضاربينها بسكتة وبرلمان الخضرا كيغلي وكيتسأل على هاد الخطوة الجديدة اللي ناوي يقوم بها البريسيدون ديال الفريق العالمي.
المنخرطين ديال الرجاء وحسب نفس المصدر صعيب ينخرطو فهاد المبادرة ديال عزيز البدراوي إلى كانت بصح، حيث هم بالأساس وافقو باش يطلع البدراوي رئيس بدون انتخابات وبلا برنامج لانه مول الشكارة و واعدهم باش يجيب لاعبين كبار ويصنع فريق قادر أنه يربح دوري ابطال إفريقيا ويتسيد البطولة الإحترافية، ماشي طلعوه بريسيدون باش يبدا يجيري ويقول للجمهور جبد لفلوس باش نخلصو النزاعات واللاعبين، وكون عرفوه هكذا ما كانوش أصلا غيشوفو فوجهو المرة الأول وكون دعمو المكاتب السابق اللي على الأقل كانت واضحة وحتى رئيس فيها ما قال غنجبد من جيبي قبل ما يجلس على الكرسي كيفما قال البدراوي اللي نعت اللاعبين السابقين ديال الفرقة بالكرارص وقال للرجاويين يعلقوه من لسانو إلى ما رجعش الرجاء كتخلع.
المصدر أكد أن الأمور فالرجاء الرياضي صبحت ضبابية والمنخرطين فاقدين الثقة فعزيز البدراوي وحتى اللي كانوا منهم متعاطفين معه ومؤيدينو رجعو اللور وبداو كيقتانعو أن الرئيس الحالي كلامو كثر من مالو، حيث صعيب يتقبلو أن الشخص اللي عطاهم صورة على نفسو بأنه الملياردير المنقذ باش يدخل للرجاء ويشري عقود لاعبين واعرين ويربح الفريق الألقاب، مازال ما حقق والو من هادشي اللي وعد به بالرغم من الدعم المطلق ديال جماهير الرجاء وغيتحول من مستثمر فعينيهم إلى مول الصينية وما قادر حتى يجيب موارد مالية من مستشهرين أو محتضنين كيفما كانوا كيديرو الرؤساس اللي سبقوه، واللي على الأقل نهار كانوا كيحتاجو الجمهور كانوا كيديرو له ديبرودوي ويدخلو منهم فلوس لخزينة الفريق ماشي يخرجو نيشان السعاية.