الرجاويين للبدراوي: باشحال غتساهم أنت وشركتك "أوزون" فحل أزمة الخضرا ولا الرئاسة لك والصينية للجمهور ؟

تسأل عدد من جمهور الرجاء الرياضي على شنو هي المساهمة اللي غادي يقدم رئيس الفريق عزيز البدراوي باش يحل أزمة النادي المالية، من بعدما خرج الصينية يطلب بها المحبين ديال الخضرا ويجمع الفلوس يحل بها مشاكل الفريق فالنزاعات ويسني مع لاعبين جداد، حيث تبين أنه عاجز على هادشي بوحدو.
ومن بعد ساعات فقط على إطلاق البدراوي للصينية تحت مسمى "الرجا معانا" وهو الشعار ديال جمهور الفريق باش يلعب على الوتر الحساس ديال محبي الرجاء، ويجمع التبرعات، بدا عدد من المشجعين الرجاويين كيتفاعلو على مواقع التواصل الاجتماعي وكيستفسرو على شنو هي المساهمة اللي غادي يقدم البدراوي براوسو للرجاء، وشحال غيحط هو فهاد الصينية اللي باغي يعمرها بفلوس الرجاويين بلا مقابل، حيث غادي يتبرعو دون ما يستافدو من شي منتوج أو خدمة.
وجماهير الرجاء الرياضي مشات بعيد وهي كتسول على الطريقة لخرج يجمع بها البدراوي لفلوس، وكاين فيها اللي بدا يوسل علاش رئيس الفريق عزيز البدراوي ما بداش يتبرع هو الأول على الفريق ويخلص هاديك 580 مليون اللي كتمنع النادي من الانتدابات، ويضمن توفير ليصالير حتى لنهاية الموسم الجاري على الأقل للاعبين والمستخدمين والمنح ديالهم، وعلاش ما تنخرطش شركة "أوزون" ديال النظافة وجمع الأزبال اللي كيملكها الرئيس ديال الرجاء فإنقاذ الفريق، خصوصا وأن الشهرة ديال البدراوي والشركة ديالو قبل الرجاء ماشي هي الشهرة اللي ولات عندهم من بعدما ترأس النادي، ودعاوه باش يبدا التبرع من راسو هو الأول.
وخلق عزيز البدراوي رئيس الرجاء الرياضي انقسام كبير وسط الرجاويين، خصوصا أن الصورة اللي عطى للجماهير قبل ما يتسلم رئاسة النادي اختلفت بزاف على ما هي عليه اليوم، وكلشي الرجاويين مصدومين فيه وفطريقة التسيير اللي خدام بها فالرجاء، من بعدما كان كيدعي أنه مول الشكارة والملياردير اللي عندو الحل السحري باش يفك الفريق العالمي من الأزمة اللي عندو، ولكن زاد غرق النادي معاه والوعود ديالو ما شافو منها الرجاويين والو حتى لدابا، وصبح الفريق ممنوع من الانتدابات وعاجز يوفر مبلغ 580 مليون باش ما يبقاش ممنوع من الانتدابات، وتحول الفريق المرجعي اللي شرفو على التسيير ديالو أطر وكفاءات كبيرة فالسابق (تحول) للسعاية بصينة البدراوي.