واخا مطالب جماهير الحسنية برحيل الرئيس سيدينو واللي معاه.. مكتب النادي ما علابالوش ومتشبث بالمدرب باكيتا اللي قدم الاستقالة

كيواصل المكتب المديري ديال حسنية أكادير مقاومة مطالب الجماهير ديال الفريق، واللي طالبت فأكثر من مرة الأعضاء فيه بتقديم الاستقالة بمن فيهم الرئيس حبيب سيدينو والرحيل.
هاد المرة ناض المكتب المديري ديال حسنية أكادير باش يقنع المدرب ماركوس باكيتا يبقى مع الفريق، واخا علن من بعد ماتش غزالة سوس والمغرب الفاسي على الاستقالة ديالو بسبب النتائج السلبية ديال الفرقة.
إدارة حسنية أكادير خرجت قبل لحظات، كتقول أنها تلقت خبر استقالة باكيتا مدرب الفريق الأول، واللي أعلن عليها خلال الندوة الصحفية اللي جات بعد اللقاء ديال نادي المغرب الرياضي الفاسي.
المسؤولين ديال حسنية أكادير قالوا أنهم متفاهمين بلي الاستقالة ديال باكيتا هو قرار جاء من المدرب تحت الضغط الكبير ديال النتائج اللي ما رقاتش للطموحات ديالو، برغم الإمكانيات المسخرة للفريق، وإيمانا من النادي بقدرات وإمكانيات باكيتا ، فإن النادي كيعلن على أنه غادي يستمر في قيادة الفريق.