منخرطين الرجاء أكدوا ما نشرت "كود".. ناضوا يدافعوا على فريقهم حيث البدراوي مامنوش وزيروه ببلاغ قوي وحرجوه

كيفما كشف موقع "كود" قبل أيام من دابا، فالمنخرطين ديال الرجاء الرياضي ناضو يدافعو على فريقهم من بعدما تأكد لهم أن الرئيس ديال النادي عزيز البدراوي عاجز على أنه يضمن حقوق الفريق بالساحة الوطنية والقارية، وبداو كيتحركو باش يحميو مصالح النادي، حيث تعرات الحقيقة ديالو وكلشي الوعود ديالو كانت غير زوبعة وصافي.
برلمان نادي الرجاء الرياضي خرج قبل لحظات ببلاغ أكدو فيه المنخرطين الرجاويين ما نشره موقع "كود" منذ مدة، وهو أنهم ما عاجبهمش السكوت ديال عزيز البدراوي تجاه بزاف د الحاجات منها 2 قضايا كيشوفو أن حق الفريق فيها غيتهضم، ويتعلق الأمر بالمشاركة فبطولة سوبر ليك اللي كتشير التسريبات أن الاتحاد الإفريقي باغي يحرم الفريق منها، وملف ماتش الخضرا مع أولمبيك آسفي وقضية اللاعب سليمان المراني، وهادشي ما قدم فيه البدراوي حتى حاجة باش يدافع على الفريق ويضمن الحقوق ديالو من غير السكات والوعود.
وجاء فبلاغ مؤسسة منخرطي الرجاء الرياضي بالنسبة لقضية مشاركة الرجاء من عدمها فالسوبر ليك: "تندد المؤسسة بأي إقصاء لنادي الرجاء كفريق مرجعي من أي مسابقة إفريقية دون إقصائيات أو تصفيات واتفق المنخرطون على تشكيل لجنة لعقد لقاء مع الرئيس ومده بمراسلة تتضمن طلب للتدخل الفوري من أجل التأكد من مشاركة الرجاء في السوبر ليك من عدمه مع حثه على اتباع جميع الأشكال و المساطر لمشاركة الرجاء في أي منافسة إفريقية كيفما كانت".
وبخصوص قضية ماتش الرجاء وآسفي اتفق منخرطو نادي الرجاء على الحضور بكثافة في جلسة استئناف حكم ما باث يُعرف بقضية إنذار اللاعب لمراني من خلال المحامين المنخرطين جميعهم وتقديم الدفوعات القانونية لكسب هذه القضية، وهذا ليس عزيزا على نادي الرجاء الرياضي، وهادشي كيأكد أن البرلمان ديال الرجاء فقد الثقة فالرئيس ديال النادي عزيز البدراوي واللي دعوه المنخرطين هو والمكتب المديري ديالو إلى سلك جميع السبل والدرجات القضائية في هذا الملف ولما لا الوصول إلى الدرجة النهائية في التقاضي الرياضي، وهي محكمة التحكيم الرياضي الدولي الطاس.
كما جدد منخرطو الرجاء دعوة جميع مكونات النادي إلى الانخراط الجماعي، منخرطين جماهير فعاليات رجاوية، للتصدي لأي مؤامرة تحاك ضد الفريق بشتى الأشكال السلمية القانونية المشروعة للدفاع على مكتسبات الفريق التاريخية والآنية والمستقبلية، وشددوا على أنه لا شيء يوقفهم عن مؤازرة الفريق في السراء و الضراء.