جمهور الرجاء تفركع على البدراوي بسبب ازدواجية المهام وعدم الدفاع على الفريق: راك غير محسوب علينا وانبطحتي

كيواجه عزيز البدراوي رئيس الرجاء الرياضي انتقادات كبيرة من طرف جماهير الفريق والمنخرطين ديال النادي، وهادشي بسبب التدبير ديالو لشؤون النادي والعجز عن الدفاع على حقوق الفريق واستخدام الرجاء كطريق ووسيلة للوصول إلى الأهداف ديالو هو.
المنخرطين ديال الرجاء الرياضي بداو كيتحركو باش يحميو مصالح النادي، حيث تبين لهم أن عزيز البدراوي عاجز عن ذلك، أو أن عندو غرض آخر من غير أنه يزيد بالفريق للقدام ويطلع به لمنصة الألقاب كيفما كان كيدعي ملي قام بالحملة باش يطلع رئيس.
والعجز ديال عزيز البدراوي أو التخادل ديالو فالدفاع عن مصالح الرجاء، وحسب الرجاويين، تفرش وتفضح، بسبب 2 قضايا اللي ظهرو مؤخرا، الأولى ملف ماتش الرجاء وأولمبيك آسفي واللاعب سليمان العمراني والثانية هي حرمان الاتحاد الإفريقي للرجاء من المشاركة فبطولة السوبر ليك، وهاد 2 قضايا كانو هما محور اجتماع منخرطي النادي مؤخرا، واللي ما عجبهمش السكوت ديال البدراوي وعدم التحرك ديالو للدفاع عن حقوق الفريق.
هاد الغضب ديال منخرطي الرجاء الرياضي زاد أكدو اليوم بلاغ صدر عن "الكوراف سود" بفصيليها "كرين بويز" و"إيكلز" واللي تكلمو فيه على منصب عزيز البدراوي رئيس الرجاء كنائب لرئيس العصبة الوطنية لكرة القدم الاحترافية، وأنه محسوب على الرجاويين وصافي، وأنه ومن خلال شعار القطيعة مع سياسة الكراسي الفارغة داخل المؤسسات والتقرب من صناع القرار فالجامعة الملكية المغربية لكرة القدم وصل به إلى حد الانبطاح.
الرجاويين رجعو كيأكدو بأن موقف عزيز البدراوي بتقلد منصب نائب رئيس العصبة الوطنية لكرة القدم الاحترافية وجمع هذا المنصب مع تولي رئاسة النادي موقف كيمثلو غير هو فقط كبدراوي، وأن الرجاويين الموقف ديالهم ثابت من ازدواجية المهام واللي هو القطيعة ومحاربة الفساد الكروي.
القطيعة ومحاربة ازدواجية المهام تبناوها الرؤساء السابقين فالرجاء بمطلب من الجماهير، ابتداء من محمد بودريقة اللي علن على استقالتو من المكتب الجامعي خلال فترة رئاستو للرجاء وسعيد حسبان اللي اكتفى فقط برئاسة النادي، وجواد الزيات اللي رفع شعار "لا لازدواجية المهام" وصوت ضد تولي سعيد الناصيري رئيس الوداد الرياضي لولاية ثانية كرئيس للعصبة الوطنية لكرة القدم الاحترافية، وهو نفس الموقف اللي تبناه أنيس محفوظ كذلك من بعد منو، قبل ما يجي عزيز البدراوي ويخرج من الجنب وينقلب على هاد التوجه ديال الرجاويين ويعلن الانضمام ديالو إلى المكتب المديري للعصبة الوطنية لكرة الاحترافية بالرغم من أنه مازال ما عقد حتى الجمع العام الخاص بالرجاء، ورفع شعار "القطيعة مع سياسية الكراسي الفارغة داخل المؤسسات" وهادشي ما داخلش للرجاويين فراسهم وما عاجبهمش، حيث كيشوفوها غير سبا باش يقضي المصالح الشخصية ديالو ماشي باش يدافع على مصالح الفريق.