كيفما كشفات "كود".. شخص براني على الرجاء سافر مع البعثة إلى تنزانيا وصورة الفريق مع السفير فرشت البدراوي

كيفما كشفات "كود" فوقت سابق فالبعثة ديال الرجاء الرياضي اللي مشات إلى تنزاتيا مع الفريق باش يلعب ضد سيمبا التنزاني، كانوا فيها شي وحدين برانيين على النادي وما عندهم صفة، وهادشي أكداتو تصويرة البعثة مع سفير المغرب بتنزانيا.
بعثة الرجاء الرياضي فدار السلام بتنزانيا ومن بعد الماتش ضد سيمبا، مشات معروضة عند سفير المغرب بمناسبة الانتصار اللي حقق الفريق، وتما كان حاضر، وحسب منخرطين رجاويين، واحد الشخص جا رفق البعثة الاسم ديالو سرحان، وراه كان فالصورة الجماعية اللي التقطت لأفراد البعثة الرجاوية مع السفير المغربي بتنزانيا.
المنخرطين منذ رحيل بعثة الرجاء الرياضي إلى تنزاتيا وهم غاضبين حيث البعثة مشاو فيها شي وحدين ما عندهم علاقة بالفريق، وهاد سرحان اللي سافر مع الفريق واللي هو ما منخرط ما عضو بالمكتب المديري، وحسب المصادر ذاتها، هو صاحب عزيز البدراوي، وهادشي كيأكد بلي فعلا أشخاص مشاو مع الخضرا فهاد الديبلاصمون وما عندهم حتى علاقة بالنادي وبرانيين عليه.
واستغربو المنخرطين من سفر هذا الشخص مع بعثة الرجاء الرياضي، وشنو الدور ديالو، شنو مشى يدير مع الفريق، فالوقت اللي كيروج شي كلام من المدافعين على عزيز البدراوي على أن هذا الشخص هو رجل أعمال فهذاك الشي ديال IPTV وكيعاون الفريق، ولكن المنخرطين ردوا عليهم وقالوا لهم إلى كان رجل أعمال وباغي يعاون النادي يخلص الانخراط فحالو فحال جميع المنخرطين، ويعاون مع راسو النادي، ويدخل للمكتب المديري كاع، ولكن الأمور تكون مضبوطة، ماشي يسافر مع البعثة وبدون صفة.
هادشي راه شكل إحراج للبدراوي والمحيط ديالو، حيث الرجاء وضعت قطيعة مع زمن السفريات على حساب الفريق من وقت الرئيس الأسبق محمد بودريقة ومن وراه جواد الزيات وبعدهم أنيس محفوظ، وكلشي متخوف يرجع السفر فابور على حسب الفريق فعهد الرئيس البدراوي، خصوصا وأن الأخير صيفط الرجاء مسخسخة فرحلة غير مباشرة إلى تنزانيا وحتى فروتور، حيث عجز يوفر طائرة خاصة تنقل الفريق نيشان.