عيينا نصفيو نيتنا وماكنآمنو لا بمؤامرة لا والو وكلشي قادر يغتاصب وكل ضحية من حقها دافع على راسها.. ولكن علاش تسرب خبار اتهام حكيمي فقضية اغتصاب مع جوائز "ذا بيست".. وعلاش السيدة ماقدماتش شكوى وواخا هكاك الادعاء العام الفرنساوي كيحقق؟

الاتهامات الموجهة للنجم المغربي أشرف حكيمي، فقضية اغتصاب بنت خرجات تساؤلات مشروعة.. ولكن قبل مانهضرو عليها نأكدو واحد النقط، اولا حنا ضد ثقافة الاغتصاب، وثانيا حنا ضد المؤامرة وضد الجملة اللي ماعندها معنى ديال "فلان مايديرهاش"، اي واحد قادر يغتاصب، واللي دار الجريمة يستاهل العقاب.
غير هو هاد التايمينگ وهاد السياق كيخلينا كناس منطقيين نكونو سيپتيك ونتسألو علاش وكيفاش وفوقاش؟
مثلا، سلوك الادعاء العام الفرنسي، اللي حسب ما سرباتو صحيفة "لوباريزيان"، بدا تحقيق من بعد ما ديكلارات بنت ان حكيمي اغتصبها من بعد ماجات عندو للدار.. علاش السيدة رفضات تقدم شكوى ضد حكيمي؟ وعلاش الادعاء العام واخا السيدة ماقدماتش شكوى آثرت المضي فاتهام حكيمي؟ ياك المتهم بريء حتى تثبت إدانته؟.
والتوقيت حتى هو فشكل! علاش تسريب الخبر عشية إعلان جوائز THE BEST؟
ومانساوش ان هادشي خرج نهار خطب ماكرون وهدر علينا وجبد البرلمان الاوربي...
راه بلا مؤامرة بلا والو، فرنسا بصح دايرة حملة ضد بلادنا، والمخابرات مابعيدش عليهم يستاعملو طرق سبيسيال باش يغرقو الشقف لشخص او بلاد..
وهنا مزيان نفرقو بين قضية سعد لمجرد اللي القضاء قال كلمتو وهو فعلا مغتصب وماعند فرنسا ماتنيط بيه، هداك حفر حفرتو براسو، وقضية بحال ديال اشرف حكيمي اللي وصل مع المنتخب للدومي فينال فالمونديال القطري وكيلعب مع باري سان جيرمان الفرنسي، وعندو بصح وزن...