واش الطونوبيل ديال البوليسي اللي حرقوه؟. لقاو "گولف" شاعلة فيها العافية فبوسكورة

من بعد ما تم دفن الشرطي اللي كان خدام في شرطة المرور بأمن منطقة الرحمة، البارح الجمعة، واللي لقاوه مليوح في حفرة ديال تصريف المياه، والجثة ديالو مخروقة، تحركات السلطات البارح بكثافة باتجاه بوسكورة من بعد ما لقاو سيارة من نفس نوع سيارة الشرطي هشام، ابن حي ليساسفة بالدارالبيضاء، وهي سيارة من نوع (غولف فولسفاگن).
السيارة كانت شاعلة فيها العافية ، ما يرجح أن المجرمين المحتملين بغاو يغطيو على الآثار ديال الجرم ديالهم، ولجؤوا إلى حرق السيارة وتركها بضواحي بوسكورة.
ولكن مازال الأبحاث ما أكداتش واش هي السيارة ديال الشرطي الضحية أم لا، لأن سيارة الشرطي اختفات معاه وما بان ليها أثر إلى أن تم العثور ليلة أمس الجمعة على هاد السيارة شاعلة فيها العافية، وحاولت عناصر الوقاية المدنية إخماد النيران ونقلها لإخضاهها لفحص وبحث دقيق.
يذكر أن شرطي منطقة الرحمة لقاوه جثة متفحمة بدوار الخدارة يوم الخميس الماضي، بعد اختفائه من المنطقة التي كان يعمل بها،وهي المدارة الواقعة على طريق آزمور، بعد العثور على الكاميرا المهنية للشرطي ملقاة بالمنطقة، ونظاراته الطبية وعليها آثار دم.