صمت القبور.. اجتماع مصغر لأمانة البي جي دي فدار بنكيران مقسم الحزب على 3 سيناريوهات: يرد بنكيران على القصر كيفما دار بنعبد الله ف2016 ولا الصمت حتا تفوت العاصفة أو الاعتذار وتدفن النعامة راسها فالرملة

البارح فالعشية قيادة البي جي دي اختارت دير اجتماع مصغر فدار بنكيران، وماشي فالمقر، باش تناقش وتعطي موقف من بلاغ الديوان الملكي اللي وبخ حزب بنكيران لدرجة أن القصر وصف هجوم البي جي دي على الدبلوماسية المغربية ب"التجاوزات غير المسؤولة والمغالطات الخطيرة"، وبأن "استغلال السياسة الخارجية للمملكة في أجندة حزبية داخلية يشكل سابقة خطيرة ومرفوضة".
الاجتماع اللي مر فأجواء ميمكنش إلا تكون مشحونة نظرا للبلاغ الواضح من القصر واللي لمح بلي البي جي دي كيستعمل ورقة الدبلوماسية للابتزاز فاش قال بلي "العلاقات الدولية للمملكة لا يمكن أن تكون موضوع ابتزاز من أي كان ولأي اعتبار".
قياديين هضرات معهم "كود" رفضو يهضرو، ولا يلمحو ولا يبررو لي وقع. صمت بحال "صمت القبور".
الاجتماع حسب مصدر "كود" حضرو ليه غير المقربين من بنكيران، العلبة السرية ديالو، طبعا فيه بوابو، وما يسمى بمكتب الأمانة العامة.
البي جي دي وللا محاصر بثلاثة سيناريوهات، يا يدخل سوقو ويسكت ويفهم الميساج لي جاي من لفوق، يا يخرج ويرد على بلاغ القصر كيفما دار نبيل بنعبد الله سنة 2016 فاش رد على بيان الديوان الملكي على تصريحات كان دارها فأسبوعية الأيام وجبد فيها الهمة مستشار الملك. ديك الساعة التقدم والاشتراكية دافع على أمينه العام. ولكن الإسلاميين صعيب يديروها، حيث مولفين كيتخباو مور الغضبات الملكية.
السيناريو الثالث هو يعتذر بنكيران للقصر، مادام هو شخصيا وافق على التطبيع مع إسرائيل، وعارف المسار فاش كادوز قضية الصحراء، والرباط معولة عسكريا على تل ابيب.
الاعتذار كيعني يدفنو راسهم كيف كادفن النعامة راسها فالرملة. أو بتعبير آخر إكرام الميت دفنه. أو بنكيران يحط سوارتو بشكل نهائي.