كفاية تخريب

القصيدة الزجلية **** مواطنة و تضحية روح وطنية **** لنبد الإرهاب و الهمجية — نعم للحداثة و التنمية **** لا للعمليات الانتحارية نعم للأمن و الاستقلالية **** لا للغبن و الكراهية —————————— حرور الزمان يعلم **** و كون ما الملح ماتكونش البنة حب الوطن من الإيمان يا مسلم **** قلوبنا و أقلامنا فيهم روح الغيرة و المواطنة **** الإرهاب عندنا محرم لا في الشرع و ألف لا في السنة هادوك غير شياطين بنادم بغاوا اخلقوا في هاذ العالم الفتنة يحلوا و يحرموا غير وحدهم الله ينزل عليهم اللعنة خلاوا شرع الله وداروا غير شرعهم وزرعوا في الدين شطنه قتلوا من الأبرياء العرارم و مشوا للنار باسم الجنة الإرهاب شكون جدهم و شحال من حبة فديك الرمانة ما عرفنا منين كنسهم و شكون أعطاهم الفيزة باش فاتوا الديوانية شكون دخلهم بلادنا بلا ما يعلم القتلة و جوه المحنة يا ويح من تاق فيهم زلقوه جلوف بنانة العسل بلا جبح عندهم قنابل الخوانة لوز وريورة إسمم و عمر تاكاوت كانت حنة العود المساوي ينغم و الغنى كلام و معنى البيض المهرس ما يتلحم و الخامج حيدوه من الحضانة محضرنا مشى يقرا عندهم علموه حروب الخيانة نوينا تلميذنا عند فقيه مسلم لقيناه تشيخ على مافيا هربانة جونا كان صافي و علاش غمم و علاش مخاخنا رجعات مجبنة مانا حليب و حليبنا رجع دم دقيقنا قمح و مال زرعنا رجع تبنة شكون في الرسل و الأنبياء اللي جاء ملغم و شكون في الرسائل اللي جات حقدانة بالكلام اللين ترسلوا كلهم و الآية باينة و مبينة واش الدين يعدم و علاش تبيعوا العسل ببزق دبان قبل ما نختم و نسلم لازم نمضي باسم جميع الفنانة واه يا داك اللي في جنب الواد * واه يا داك القادم من وسط البحور * ما عار الشبكة و الصياد * و ما عار حيوط الديور* ما عار حوتنا ارجع تسماد * وما عار كبادنا تخرج عشور * ما عار سكان البلاد* * ما عار الضيف عند ولاد الجواد * وما عار السياحة في المعمور * ما عار * وما عار * نارنا بردات و لات رماد * و طيرنا تلف على تنشاد الطيور * العقل مشطون و القلب مكوي بالغداد * عقول الفساد غروه من اللور * كان عندنا عيد الأعياد و رجعوه الشياطين دم مغرور * الزلة تزول وكيت من زاد بلا زاد * عاش إنسان ومات كلب مسعور * ياك ذاب القالب بلا براد * و صبحات الشيبة كشيفة للمستور * فين المحبة و الخاوة اللي خلاوا الأجداد * و فين السلم و الامان و العمل المشكور * مانا حليب و حليبنا ماء عليه النفاد * السومة و البيع معلومة حتى في الحدور * حجرة على حجرة قلنا هادا تشياد * و جريدة بلا ماء قالوا جنان الحبور * كنزنا ذر و عندنا رحال البلاد * يا الطامع في الدنية لا تكون مغرور * سلم و سلم و باركة من التخريب و الفساد * حاور تنجم و الحوار دستور * تعلم و علم ما دار عاد و إرم ذات العماد* و خير الأخبار الجهل عار و العلم نور **