الفلكي انشكاين

( 21 مارس / 22أبريل )
فصل الربيع دخل عليك بالخير راه الصبر مفتاح الفرج، ملّي تشوف بنادم تابعك عرف بلّي راك ناجح فحياتك وطريقك صحيحة، كتمر بشي ظروف قاصحة شوية ولكن بعد العسر يسرا، الحب والمال وراحة البال فالطريق زيد اجتهد.
( 23 أبريل / 20 ماي )
الصمت حكمة والهضرة بزاف كتجيب صداع الراس، من صغرك كتخاف من عيشة قنديشة وهذا سباب الوحدة ديالك لبنات معهم كاين الأمان، لحبيب لقديم عينو زايغة ورجلو طويلة وراد لك البال من بعيد، نوض خدم على راسك الوقت فايت.
( 21 ماي / 21 يونيو )
ناس الغيوان قالوا ياك الماضي فات، نسى الهم ينساك وحاول تنساجم مع الحب من جديد، الخدمة عندك بخير وشي فرصة كتقلب عليك بالرّيق الناشف، صاحبك عارف بلّي غلط معك وناوي يجي يتسامح معك والمسامح كريم، تهلا فصحتك.
( 22 يونيو / 22 يوليوز )
الصبر عطاك النتيجة أولدي والخير بان شوية ولكن رد بالك مازال الطريق طويلة، الأعداء موجودين فكل مكان الوالدة راضية عليك بزاف وبغات تفرح بك، لحبيبة عندك ديما واجدة بحال سوبر حادة، حمد الله على صحتك وتهلا فكرشك.
(23 يوليوز / 22 غشت )
مواليد برج الأسد سخن عندهم الحال فبل الوقت، العاقة صفر درهم والدعايات ملياردير، الفايسبوك غادي يخرج عليك وزيد عليه لقهاوي والهضرة فالناس، لحبيبة بغات راجل فالواقع ماشي فالأنترنت، لخبر فراسك راك كبرتي التران فاتك.
( 23 غشت / 22 شتنبر )
كتجيك الفرص بين يدك كتخليها لعباد الله، لحبيبة بغات تبدلك رد البال وديها فخدمتك راه العاقة هذا وقتها، شي ناس محتاجين المساعدة ديالك كن راجل، الخدمة عندك فالمستوى والوالدين راضيين عليك، شي هضرة دايرة عليك فالحومة فيها خير.
( 23 شتنبر / 22 أكتوبر)
شحال غادي تبقى متكّل على بنادم، جا الوقت باش تعلّم دّير خدمتك بيدّك، غير تفارق مع الحب تكون بخير صحتك راجعة اللّور بزاف، نعس بكري باراكا عليك من السهير بالليل، شي ناس عينهم عليك من بعيد واقيلا شي خدمة جديدة.
(23 أكتوبر / 21 نونبر )
إيلا بقيتي غادي يهاد الرّيتم متلوم غير راسك، راه كاين فرق بين الصيف والربيع كما تدين تدان لا خدمة لا قراية غير الدعايات الخاوية، حياتك مقلوبة بحال السطل دالحمام، باراكا عليك من قناة دوزيم راها خرجات عليك، وجهك ماشي دالحب.
( 22 نونبر / 19 دجنبر )
عين الحسود لا تسود غير دير النية والكمال لله، راك بخير من جميع النواحي ماديا الخدمة بخير لفلوس كاين البركة، معنويا الحب مكتفكّرش فيه وهو لاصقك عليك بالمحاولة، شي كلام داير عليك بين صحابك نهار يوصلك فكّر بعقلك.
( 20 دجنبر / 19 يناير )
فكر فالمستقبل مزيان لفلوس آخر حاجة تفكّر فيها باش تعرف توزن حياتك، لحبيب ديالك مقلق عليك من شي كلام داير عليك فالمدرسة، حاول تكون متوازن وفرّق بين الحب والعمل والدراسة باش توصل، لبنات فيهم المشاكل اللهم إني بلغت.
( 20يناير / 18 فبراير )
عيبك الوحيد هو أنك عاطي ودنك لعباد الله بزاف، تصرّف بعقلك ودير للّي فبالك صحابك طالبين السماحة والماضي نساه وبدا من جديد، شوفلك شي خدمة بدا بها حياتك خلّي الحب يفتش عليك، تهلا فصحتك بالماكلة والنعاس فالوقت.
( 19 فبراير / 20 مارس )
زيد اجتهد راك فالطريق الصحيح وربي كبير، الخدمة عندك فيها العاقة ناقصة ولكن يكون خير، شي ناس هادرين فيك خلّيك ساكت لا داعي لشي مشاكل باراكا للّي فات، عاطفيا راك مقبول من عند الجميع الحب لقديم مهتم بك المسامح كريم.
**رشيد يشو**
**بريس تطوان**