حنا مقاطعين...؟؟

أنا مقاطع ، أو حنا قررنا نقاطعوا الإنتخابات، صبحات كتردد بزاف سواء من طرف أشخاص أو هيآت، حتا عشرين فبراير هي الأخرى ، خذات قرار المقاطعة . القرار يحترم ، و لكن واش عارفين بلي المقاطعة ديالكم ، ما كتسوا والو؟؟.

علاش ؟ دابا منين الدول اللي حنا كنشهدو ليها بالديقراطية = مع الأسف ما بقات ديمقراطية ، خصوصا عندنا حنا العرب ، اللي كنتبجحو بهاذ المصطلح بزاف ، الديمقراطية كيقولو هي حكم الشعب للشعب ، و القلية كتخضع لقرار الأغلبية ، وحنا دابا كنعيشوا العكس ، الأقلية هي المسيطرة و كتفرض الرأي ديالها على الغلبية ، إما بدعم صهيوني أو حلم أردوغاني.

و كانت النتيجة : حرب أهلية فليبيا ، 132 حزب قتونس ، و قرب تدخل أمريكي فمصر ، و هذا هو الربيع العربي إلا فلا = غادي تجي هاذ الدول و تتبع معنا الإنتخابات 25 نونبر 2011 ، غادي تلاحظ النتائج ديال عدد المصوتين صحيح كيفما غادي تصرح وزارة الداخلية ، و طبعا غادي يتجاوز 50 في المئة ، غادي تحتقركم لأن الشعب ما استجابش ليكم ، و انتما كي عادتكم غادي تشككو فالتصريح و تقولو الداخلية كذبات . و لكن هاذ الدول اللي أنتم كتتبعوهم = و بالمناسبة راه أصبح كينطبق عليكم قوله تعالى " قل لن ترضى عنك اليهود و النصارى حتى تتبع ملتهم " و كذا الحديث ديال سيدنا النبي ، توشك أن تتداعى عليكم الأمم .." = بلي راه الوزارة التصريحات ديالها صحيحة و انتم اللي غالطين . إذن فين كاين المشكل ؟
أسي ، راه المقاطعة قرار يحترم ، و لكن القرار إلا كان بلا ما تكون مسجل فاللوائح الإنتخابية ، راك ما محسوبش أصلا ، أي راك خارج اللعبة . فالناس اللي غادي تحسب مقاطعة أو ممتنعة على الإدلاء بالصوت ديالها ، هي اللي مسجلة في اللوائح الإنتخابية و ممشاتش تصوت ، و هاذوك طبعا ضمن 13 مليون مغربي تقريبا اللي مسجلة من أصل 20 مليون تقريبا ، و إذن إلا صوتات غير 6.5 مليون راه النسبة ديال التصويت هي 50 في المئة .
لنفترض جدلا ، أن هاذ الدول خذات ضمانات من عند الدولة و قالتلكم شاركو فالإنتخابات ديال 25 نونبر ، واش يمكنكم تقولو ، كيفاش غادي تمنعوا الناس اللي مفسدين مينجحوش ، الأمر بسيط لأن حركة 20 فبراير برا من اللوائح الإنتخابية ، بينما حركة 20 ألف فرنك ، مسجلة و غادي تصوت ، فالمسؤولية على عاتقكم ، و بالتالي سمحولي نقولكم راه المغرب و التغيير باغي الرجال اللي يخدموه ما شي الأصوات الناشزة .