درس خاص حول كيف تُصبح عُنصريا في سبعة أيام….

العنصرية من بين لحوايج للي كيصعاب للغاية أنك تلقى ليها واحد التعريف او مفهوم واحد عليه إجماع بزاف ديال الناس، بحيث أنه أي واحد على حساب مدار گانته، يقدر يجي ويختزلها ليك في قالب معين يراه هو وحده الصواب او بناء عليه كيبني گاع لموافق ديالو، بالاخص دوك الناس للي كتلقاهم واخدين الامور والحياة بواحد الجدية فوق اللزوم ،وكيجيو يبغيو ينكدوها حتى على الاخرين ،بحال مثلا استحضر هنا على سبيل الذكر لبلان لي كان وقع هادي تقريبا ما يناهز واحد لعامين مع المنشط الفكاهي جريمي كلاركسون ،مقدم برنامج توب جير ديال الطوموبيلات على قناة ام بي سي سابقا ،وللي تم توقيفو نتيجة لشي ظغوطات بسبب قاليك دوك _الالفاظ العنصرية_لي كان كيستعملهم بشكل مستمر وقيتما مشا لشي دولة، كيحاول يطلعها عليهم،
الشي لي جعل خوتنا في الله "الدغابيش" للي دوينا عليهم، ينوضو يرفعو عليه دعوات قضائية غادي تدفع من بعد بمدير لقناة انه يصوبنو بذريعة تصرفيقته الشهيرة لاحد اعضاء الطاقم ديال القناة، مهم في لمقابل ناضت الشريحة الاكبر للي باغا تضحك وماعلابالهمش بدوك العقد ،انتفضو عن بكرة ابيهم..و دارو مظاهرات في بريطانية،وعلى غرارها دارو عريضة للمطالبة باعادة كلاركسون للبرنامج ،او تفاقم الامر او وصل حتى لتهديد مدير القناة بالتصفية في حالة يلا مابغاش يرد السيد لبلاصتو،
مهم ورغما عن داكشي هو فضل انه يتحول لقناة اخرى، وكمل فستيلو ديال لموضحيكة بنفس لحدة،وبقا محافظ على اعلى نسبة مشاهدة فلعالم ،
وبالتوازي ايضا مع لبلان ديال كلاركسون سبق و أن تم اتهام حتى الكوميدي سبايك ميلغمان بالعنصرية بسبب "تماديه" في التقشاب على لهنود ،وعيا ما ينفي ليهم بلا داكشي لا علاقة له بالعنصرية، وان كل ذلك يمر غير في اطار التنكيت والطنز،غير أن" الدغابيش"، على ما يبدو ماعندهاش مع هاد النوع من السخرية،للي من طبيعة لحال رغما عن انف انوفهم را ماعمرهم غادي يقدرو يحبسوها، ولا يمنعو شي حد من ممارستها،
حيتاش اصلا حتى على الصعيد المجتمعي، التنكيت بهاد الاوصاف شي حاجة للي جاري بها العمل فمعظم الدول، بحال مصر مثلا لي كيقشبو بشكل اعتيادي بالصعايدة، او الانگليز لي كيشدو في الاسكتلانديين ،او فلعراق مع لكرد ،ولعكس،وزيد وزيد
وبحال مثلا ديك الثنائية لي عندنا تا حنا المغاربة ديال الشلح او العروبي …أو العبدي والدكالي…لبركاني ولوجدي ….والخ… وهادو مثلا بالنسبة لينا كمجتمع على نحو ما تجاوز ديك النزعة العشائرية.. مجرد "قفشات"كنقشبو بهم مع بعضياتنا بدون اي خلفيات موغلة في الاحتقار،وبدون اي احقاد
حيت العنصرية أصلا حسب التعريف (السائد) هي_ الاعتقاد_ بوجود فوارق جينية كيتميز بها مجموعة ديال لبشر لمجرد إنتمائهم لعرقي او الاثني او الديني، وإنطلاقا من ذلك يتم التمييز،
بحال ديك التخربيقة ديال العرق الاري مثلا،او حتى "كنتم خير امة اخرجت للناس"
وماشي هي بديك لبساطة ديال فين كتوصف واحد الانسان بشي صفة متدوااالة إلى أبعد مدى عند كافة أقطاب الشعب..وكتكون مدوزها غي" بالضحك"وهادشي عادي
بإستثناء بعض الحالات بحال لميريكان لي عندهم ظروفهم الخاصة لي كلنا عارفينها ،وللي لا يمكن باي حال اسقاطها على جميع المجتمعات…
مهم اختصارا وبناء على كل ما سبق أعتقد بأن مفهوم ديال العنصرية الحاقيقي نعماسيدي ولي قطعا مرفوض هو الاعتقاد ،والافعال،فقط
بحال مثلا يلا جمعتي شي مجموووعة ديال البشر كحل الراس كنت تختلف معهم مثلا في اللون …أو المعتقد …او القبيلة…او حتى غا وجهة النظر …وجبتي شي كلاشينكوف وستفتيهم فوق الشواية… وبديتي كتيري فزبور مهم ……هااادي را هي العنصرية ….
أما ما عدا ذلك يدخل في إطار "طلقها على مولانا تسرح" وصافي