حصيلة المكتب المسير لنادي لأولمبيك الحكومي المغربي

و كما هم معلوم أنه مند ما يزيد عن 8 أشهر تم تجديد المكتب المسير لأولمبيك الحكومة المغربية و قد تمت عملية التجديد عن طريق الانتخاب حيث تم إزالة الشلاهبية من التسيير برئاسة الأستاذ المناضل شلهوب الشلاهبي و رباعتو,



و قد اختار الجمهور مجموعة الممانعة لتكون في التسيير دون أن نغفل على أن وجود الشلاهبية كان ضروري رغم كل الانتقادات التي عرفها مسارهم في التسيير لأن الجمهور مزال فيه صحاب التجارة الموسمية تاع 20 الف فرانك و سمعني صوتك يا مواطن



و قد عبر الرئيس الجديد للنادي الحكومي في لأول عن فرحته بتولي المنصب الجديد و قد وعد بأن يجعل النادي المغربي في طلائع رغم كونه حاليا في القسم الثالث هواة



وعد وعود كثيرة لم يحقق منها شيء الا كون الفريق سوف يعرف طفرة نوعية في عهده و الحمد لله و الله ما طفرناه



كانت أول قرارات السيد الرئيس يزيد جوج دراهم في تيكيتا تاع تيران دون مراعاة أنو ناس أصلا ثمن دخول تيران راه غالي عليهم كانو طامعين في نقوص صدقو فزيادة



و قد تحجج سي رايس بأنو الا ما زدناش دوك دريهمات غادي نولوا في أزمة معندناش باش نخلصو اللعابة و مابغاش مسكين يتسلف من شي نادي كبير من أوروبا أو أمريكا و يستنزفو ليه اللعابة و يدخلوا معاه في تسيير حينتاش هو مومن و عارف ما كاين تيقة في المشركين و الكفرة بالله



اوا دوزناها بجغمة تاع لماء و قلنا نصبروا معاه تا يفك الله وحيلوا على خير راه مسكين حامل لا ماشي هاديك حامل للمسؤولية

اوا ملي سولناه اسي رايس هد القرارات راه داروا لينا مشكل شي مفسدين ولاو اما كيزرو وريقات تيران أو كيبيعوهم في السوق السوداء و راه حنا عرفناهم لا بغيتي سميات مرحبا

قال لينا خلوهم والله يسامح و عفا الله عما سلف وا سي الرايس راه واخا درنا عفا الله مزال و كاين لي كيسرق لكواري من تيران عين باين و الجمهور كيشوف

قال لينا اوا منهم لمولاهم الله ياخد فيهم الحق اللهم قوي إيمانك اسيد الريس و بصحة العمرة و نعاود نقولها الله لا طفرناه



اوا نخلو الرئيس يطوف و نرجعو المكتب المسير و الله تهد خيلوطة تاع المكتب المسير وحدها خصها 5 سنين باش تفك و يتفاهمو على كلمة وحدة عاد يفوكو مشاكيلنا حنا



لي مكلف بالشكارة في النادي من المجموعة لقديمة تاع الشلاهية و ماشي شلاهبي عادي لا لا لا هدا اسادي نسيب سي شلهوب شخصيا سميتو مشتقة من وزة او بطة و على يدو طارت البركة تا من تيران كشف ولڭازو نشف و حتى لكويرات تاعنا تفشو سير اودي ابن وزة الله يعطيك أنفلونزا الطيور



و كاين حتى السيد لي مكلف بلكار و طوموبيلات تاع تنقل الفرقة كان طمع الجمهور انو مصاريف النقل غادي تولي على حسابو و حتى لي بغا يزيد شي طبقة فدارو الرملة على حسابو حنا من الفرحة مشينا شرينا سيما و لبريك سعى ملي وحلنا وحلنا بنينا بيهم في العشوائي



و كاين واحد المسير مسكين غير كيشير ها هو قاليك والله ماتش لا داز الا لكان الجمهور موضي وعلى طهارة و اللعابة مصلين لفجر و حتى نقل التلفزي للموبارات تاع فرقتو تكون بادية بأناشيد و تسالي بالأدعية
مسكين تركل تا عيا و صدقت البيرة كتباع وسط التيران ديالو و فهم تسطا



التشكيلة تاع المكتب و الله تا مريڭلة سيد لي شاد سيكيريتي الأمن زعما في تيران شلح لا هو فاهم شعارات الجمهور و لا لجمهور فاهم داكشي لي كيقول هدشي علاش ديما كيعطيهم الزرواطة الله يجعل كلامنا خفيف على قلوبهم خوكم شبع زرواطة و الله ما بقى فين تسلخ اسي العنبر المحترم الله ريحتك عاطية تالهنا



المدرب الرياضي تاع الفرقة بوڭوص أوزين بينو و بين التدريب غير لخير ولحسان و أحسن انجاز دارو تال دابا هو صور بنتو مع ميسي هههه ناري كنتفكر ميسي كنبدا نضحك غير وحدي

اه نسيت و الله تا هدا انجاز شرك لينا الرياضة بالنشاط ولا جري و لكورة منشطات تفرج و ضحك اوا الله يكتر خيرك و ما تنساش تهلا في لبنية


الحاصول هد المكتب وحل فينا و وحلنا فيه الله يدوز سيريسهم على خير واخا بيناتنا كاين شي مسيرين معمرنا سمعنا بيهم اش كيديرو و السبات العميق
اخر كلمة ها لعار لما شوروا على هد الفرقة و على هد الجمهور راه إلا مشا تا قلب وجهوا غادي نولوا في فكها يا من وحلتيها