غير داوي

القنيطرة ضَلمة
أخيرا، إنطلقت مسيرة الإحتراف الكروي في بلادنا، تلك المسيرة التي كانت تتأجل في آخر اللحظات بفعل ردة فعل رؤساء الأندية غالبا.. فالحمد لله الذي زرع في مسؤولي الجامعة الشجاعة ليواجهوا غضبات رؤساء الأندية واحتجاجاتهم الهاوية التي أدت بكرتنا إلى الهاوية.. لذا ينبغي أن نحيي بصدق معالي رئيس الجامعة الملكية السي علي الفاسي الفهري الذي يردد الآن بيت المعري الشهير:
وإني وإن كنتُ الأخير زمانه لآت بما لم تستطعه الأوائل
يعني، واخا قالوا علي جاي من الفوق لاحتني الطيارة، راني درت داك الشي اللي ما قدّوش يديروه اللي دازوا قبل مني خالدين فيها وساروا إلى زوال، فشكرا للرئيس الذي دخل المغاربة في عهده أول بطولة إحترافية نستطيع أن نتباهى بها أمام نظرائنا الذين سبقونا بقرن وزمارة.
ناااري، واش بان ليك شي فرق بين البطولة العام اللي فات وهاد العام؟
الحمد لله هاد العام كاين الوضوح والشفافية، حيت مع الإحتراف كلشي دابا كيدوز كدام عينينا.
وا ناااري، فين هو هاد الإحتراف والكاك استقبلات الراجا في الرباط؟
إيوا، حيت دومو قاطع على القنيطريين الما والضو، خاصهم هوما يرفعوا شكاية لرئيس الجامعة مول المكتب الوطني للماء والكهرباء..
عرفت القنيطرة حراكا شعبيا كرويا طالب رئيس فريق النادي القنيطري بالرحيل.. كان جزء كبيرا من شعب حلالة يقود ثورة صامتة تشير إلى أن نهاية حكم سلالة آل دومو باتت وشيكة جدا، وبذلك أعطى أملا عزيزا في رؤية غرباوي واحد غير دومو يستحق أن يقود فريق المدينة.. فقد كان الرأي العام يترقب كيف سيتدبر المجلس الإنتقالي مرحلة ما بعد دومو التي تزامنت مع إطلاق أول بطولة إحترافية، أما خبر رحيل دومو فكان أمرا مفروغا منه.. حتى حدثت المفاجأة المزلزلة: «المكتب المديري للنادي القنيطري ينتخب بالإجماع حكيم دومو رئيسا مدى الحياة لفريق الكاك».
كان أمرا صادما، حيث لا يمكن أن يثق الشعب في حقيقة التغيير ما لم ير الوجوه التي حكمته طويلا تتغير.. لن يقتنع بسهولة بأننا دخلنا مرحلة احترافية جديدة ما لم ير المسؤولين الذين كانوا في الواجهة يتراجعون إلى الوراء كثيرا، طبعا هناك من يرى أن ليس شرطا أن تتغير الوجوه القديمة بوجوه جديدة كي نقتنع بحدوث تغيير، لأن هذا النوع من التغييرات شكلي ويحقق فقط احتراف الواجهة، يعني يا المحترف من برّا آش خبارك من الداخل؟ نعم، قد يتسيّف المسؤولون بسهولة، يعني من غدّا يولّي يبان لينا الكرتيلي بحال فلورنتينو بيريز، كما يمكن للمسؤولين أن يغيروا جلودهم بسرعة حسب ما تقتضيه المرحلة، وقد يتوفقوا خلال مرحلة الإحتراف في ما عجزوا عنه في مرحلة الهواية، لكن راه من النهار الأول باين العربون، فالكاك استقبلت في أول مباراة لها بالبطولة الإحترافية بميدان غيرها، علاش؟ حيت التيران ديال القنيطرة ما فيهش الضو.
هنا فين كيبان ليك التخربيق، ياك دومو التزم في دفتر التحملات باش يكون عندو تيران فيه الضو؟
وياك الجامعة هي اللي عطاتو الترخيص بناء على دفتر التحملات اللي كيقول بلي الفرقة خاص يكون عندها تيران فيه الإنارة؟
آشناهو بعدا دفتر التحملات؟ راه غير كنّاش فيه الاوراق.، الجامعة يحساب ليها الإنارة كاينة بصّح، حيت السي دومو رسم ليهم بالستيلو في هاد الدفتر تيران واعر كلو ضواوْ بحالا غادين يلعبو في وسط مرجان.
أواااه، أنا خايف غير الصاليرات ديال اللعابة يكونوا حتى هوما مرسومين غير بالستيلو.

نافذة
يا المحترف من برّا آش خبارك من الداخل؟