لهبيلة

لهبيلة .. دوات
لهبيلة .. سكتات
لهبيلة .. دقات ع الباب
وگالت : شكون يلگا لينا لجواب
شكون يمشي على شوك التراب
ف خطواتي نمشي
و العقل ف الحساب
والليل حاير ف ظلامو
والقلب فدگات ليام
صاح : من ضفر لغدر عييت
لهبيلة گالت : اللي هضر
لهبيلة گالت : اللي صبر
لهبيلة گالت : اللي تغدر
لهبيلة گالت : اللي هجر
بين بحر .. وبر
بين برد .. وحر
بين خير .. وشر
بين سعد .. و زهر
بين شي ف العباد يشفر
وبين شي ع الكرسي مشمر
لهبيلة گالت :
شكون ، كذب شكون
شكون ورا الباب شكون
شكون يتحدى الخوف
ويتسلح ب الحروف شكون
شكون يهبش ع السر المدفون
شكون يطرد الذيب المجنون
شكون يريح لعقل المشطون
شكون گال : شكون
شكون سكت شكون
من كثرت شكون
بقى حرف ، الخا ، خ
ف ضمير مسكون
ولهبيلة گالت :
تعكر النقا
و فاح الشقا
يمكن يكون .. فينا ، خ ،
يمكن يكون .. فينا ، ج ،
يمكن يكون .. فينا غدر
يمكن يكون .. فينا عذاب
يمكن يكون .. سؤال احتار ع الجواب
يمكن يكون .. هبال سارق هبال
سلكوه خداعة
وما سلكوه عقاله
سلكوه المفتونين هباله
تجمد الضمير
و راس تدلى
لهبيلة گالت :
كيف وراق الطبلة
ف الفساده غارقين
سوطا ف القاعة رشاوي
و راي ف المحسوبية وتناوي
و الكابال گطع لحمارو الگصة
وگال : نهايتكم أ لحمير إلى تبدا
وقوفكم قمع
وگلوسكم دمع
لهبيلة .. دوات
لهبيلة .. سكتات
لهبيلة .. سلام
لهبيلة .. كلام
ما هي دراكولا
ما هي ديكتاتور
ما هي إمبراطور
ما هي تراكتور
ما هي قنديل
هي بداية ؟
هي نهاية ؟
هي حلت الباب
من مسلك لخيال
لهيه .. لهيه
نبكيوا على اللي مشى
ونعيشوا على اللي فات
لهيه .. لهيه
نكتموا الدمع ف الكتاب
ونگولو : مكتاب
لهيه .. لهيه
صورة مضرورة
كشفة العورة
لهيه .. لهيه
لهيه.. فلون الليل
هجر القنديل
لهيه .. لهيه
لهيه .. ف سوق العجب
ما كاين غير كب شقلب
المسألة حتمية
ف جوف الخوف مخفية
لكلام ما جا ف صميم
بين حرف ،الخا ،
وحرف ، جيم ،
المسألة منسية
ف سيدي سماعين مخفية
لهبيلة .. دوات
لهبيلة .. سكتات
لهبيلة .. جات
لهبيلة .. مشات
مشات ..
أم مشات ..
.. شات ..
شات
زاوية سيدي إسماعيل 29.11.2010